Khawvel huapa infiamna ngaihhlut hlawh zual zinga pakhat chu Basketball a ni a. Khawvel ram ropui leh thil tithei ber USA in an ngaihsan a nih tlat vangin Basketball-ah hian sum pawh a tam hle. National Basketball Association (NBA) a player langsar zualte phei chu khawvela infiammi hlawh hnem zual zingah pahnih thum tal chu an tel ngei ngei thin. Basketballer ropui leh hmingthang tak tak an awm nual a, chung zinga tha zual 10 nia hriatte kan tarlang ang.
10. Magic Johnson
Ft 6 leh inches 9 ngawta sang, No. 32 nena inhmeh tak Magic Johnson hian kum 1979 khan Los Angeles Lakers an zawm a, LA Lakers tan hian kum 1991 thleng a khel phawt a. Kum 1996 khan a vawi hnihnan LA Lakers tan hian a khel leh zuai bawk. LA Lakers tan a khelh chhung hian NBA-ah vawi nga an champion a, NBA-ah vawi nga an champion rual hian final MVP-ah vawi thum thlan a ni. Final MVP-ah vawi thum thlan a nih rualin regular season MVP-ah vawi thum thlan tel a ni bawk.
Magic Johnson hi hruaitu nih tling a ni a, LA Lakers tana a khelh chhung hian hruaitu ropui nih a tling. Amah a palian bawk a, a che vel a hmuhnawmin a hna a tlin viau thin.
9. Hakeem Olajuwon
NBA club lian Houston Rockets leh Toronto Raptors tana khel tawh defensive player tha zet mai Hakeem Olajuwon hi kum 1994 khan Most Valuable Player (MVP), Defensive Player of the Year leh Finals MVP-ahte thlan a ni rual thawt a, chawimawina dawn lamah lungthu a kim. Tun thlengin kum khata MVP, Defensive Player of the Year leh Final MVP chawimawina hui vek thei awmchhun a la ni nghe nghe.
Olajuwon hi a kechheh a mawiin a dik a, defence lama ril leh turu tak a ni bawk. NBA a khelh chhungin vawi hnih an champion a. MVP-ah vawi hnih thlan a ni a, Final MVP-ah vawi hnih thlan a ni bawk. Houston Rockets leh Toronto Raptors-a a khelhpuite hriat reng tur khawpa langsar tam lo mah se Olajuwon erawh hi chu a larin, mimal taka tan a hlawh viau thin.
8. Stephen Curry
Golden State Warriors tana khel mek Stephen Curry hi NBA player zingah palian ni phak lo mah se a che vel a hmuhnawm in, inkhel tihmuhnawm zingah a tel reng thung. Point thum vawm lut thiam bik a ni a, a chevel a hmuhnawmin tan a hlawh viau thin. Curry hian Golden State Warriors chu NBA-ah vawi li a champion pui tawh a, MVP-ah vawi hnih thlan a ni a, final MVP-ah vawi khat thlan a ni bawk. Kum 2009-a a zawm Golden State Warriors tan a la khel mek a, Warriors player tan rawn hlawh a ni. Basketball khel mek a nih vangin Curry hian tuna a dinhmun aia sanga invawrh theihna hun tha tak a la nei.
7. Shaquille O’Neal
NBA team lian tak tak Orlando Magic, Los Angeles Lakers, Miami Heat, Phoenix Suns, Cleveland Cavaliers leh Boston Celtics tana lo khel tawh thin Shaquille O’Neal hi player thahrui ngah, fitness tha leh che rang em em mai a ni a, a che vel a hmuhnawm viau thin. Shaquille O’Neal hi NBA-ah vawi nga a champion a, tum thum ngawt final MVP-ah thlan a ni a, regular season MVP-ah vawi khat thlan a ni bawk.
6. Kobe Bryant
Basketball ngainatute player ngainat ber berte zinga pakhat chu Kobe Bryant hi a hi. January ni 26, 2020-ah Helicopter chesuala boral ta Bryant hian kum 1996–2016 chhung khan Los Angeles Lakers tan a khel a, LA Lakers hi NBA-ah vawi nga a champion pui. Vawi nga ngawt LA Lakers an champion pui rual hian final MVP-ah vawi hnih thlan a ni a. Regular season MVP-ah vawi khat thlan a ni bawk.
5. Tim Duncan
Feet 6 leh inches 11 zeta sang Tim Duncan hi San Antonio Spurs vawrh lartu leh tiropuitu a ni. Ducan hian kum 1997–2016 chhung khan San Antonio Spurs tan a khel a, Spurs hi NBA-a a nun bul tanna leh a tawp kharna a ni tel bawk. Spurs hi tum nga ngawt NBA-ah a champion pui a, final MVP-ah vawi thum thlan niin, regular season MVP-ah vawi hnih thlan a ni bawk. San Antoni Spurs hi NBA-ah vawi nga an champion tawh a, heng an ropuina zawng zawng hi Tim Duncan hun laia an hlawhchhuah a ni.
4. Larry Bird
Larry Bird hi shooter hlauhawm bik, pa huaisen leh rilru tha tak; player ngainatawm bik a ni. Kum 1979–1992 chhung khan Boston Celtics tan a khel a, Celtics hi NBA-ah vawi thum a champion pui. A vanglai hian kum thum chhung ngawt MVP chawimawina a dawng zawn nghe nghe, final MVP-ah vawi hnih thlan a ni bawk. Hetih hun lai hian Magic Johnson nen an inel nasa thei hle a, Magic nen an inel a, an inhmachhawn vel hi NBA tihmuhnawm leh zualtu a ni thin. Magic Johnson nen an inelna boruak lian tak karah MVP-ah vawi thum ngawt thlan zawn a ni hi Larry Bird hlutna tisang leh zualtu a ni.
3. Kareem Abdul-Jabbar
NBA a awm chhunga hming dai ngai tawh lo tur Kareem Abdul-Jabbar hi player tlo leh daih rei, sang tak atanga ball vawm luh thiam bik a ni. NBA-ah point thawkchhuak hnem ber a ni reng thin a, a record hi NBA khel tam ber LeBron James-a’n a khum tawh thung. Abdul-Jabbar hian kum 1969 atanga 1989 chhung khan Milwaukee Bucks leh Los Angeles Lakers tan a khel thin a, NBA-ah vawi 6 an champion a. Regular season MVP-ah vawi ruk thlan a ni a, tun thlengin MVP ni ngun ber a la ni reng a. Final MVP-ah vawi hnih thlan a ni tawh bawk.
2. LeBron James
Thiamna ril leh daihzai, daih rei leh ropui bik LeBron James hi Basketballer zingah mimala record nei tha ber a ni a. Basketball ngainatuten player roui bera a ngaih leh an ngaihsan em em a ni.
Player ropui bik LeBron James hian Cleveland Cavaliers tan bul a tan a, Miami Heat a zawm hnuin Cavaliers ah bawk a kir leh a. A hmangaih hmasa Cavaliers hi kum 2018 khan chhuahsan nawn lehin Los Angeles Lakers tan a khel mek a ni. James hian NBA 2025-26 a hmachhawn dawn em tih a chian loh reng hnuin contract pawt seiin NBA-ah a inlan zui dawn tih a tichiang fel tawh a, NBA-ah season 23 chhung inlan thei record a siam zui leh nghal. Mimal record ropui tak tak hnutchhiah tawhtu LeBron James hi NBA-ah vawi li a champion tawh a. Regular season MVP-ah vawi li thlan ni tawhin, vawi li vek Final MVP-ah thlan a ni tawh bawk. A mimal record ropui tak tak tarlan vek sen a ni lo va, player ropui bik chetla kan hmu thei hi lawm tur kan ni a, NBA a hmachhawn lai hmaih phal tur chi kan ni lo.
LeBron James hian NBA a hmachhawn zui leh dawn a, Basketball a chawlhsan meuh chuan Michael Jordan chungah a chuang hial lova tih a sawih theih loh a, ‘pa chauhin a hria’ tih ang kha a ni.
1. Michael Jordan
Basketball chanchin sawi chuan player ropui Michael Jordan chanchin sawi tel a ngai thin. Michael Jordan hian mimal record siam kur nguai lo mah se mibik; thiamna nei ril; mi bik a lo ni bawk nen Basketballer ropui berah chhal a ni reng thin a, LeBron James nen khaikhin ni fo thin mah se Jordan hi Basketballer ropui ber GOAT ah pawm a la ni reng thung.
Chicago Bulls player ropui Michael Jordan hian
NBA final vawi ruk a khel a, finals an khelh zawng zawngah an champpion vek a, final an thlen vawi rukah hia Final MVP-ah thlan a ni vek bawk. Final MVP-ah vawi ruk thlan a nih rual hian regular season MVP-ah vawi nga thlan niin vawi 10 ngawt scoring champion a ni tel bawk. Michael Jordan hnuhma ropui tak tak tarlan tur tam tak a awm a, tarlan vek sen erawh a ni lo. Kan thu kharna chu Michael Jordan hi Basketballer ropui bik tia khawvelin a hriat reng tawh tur a ni.