Shiv Sena (UBT) leader Sanjay Raut chuan June 9 ah BJP kaihhruai NDA te chuan sorkar an siam a ni thei a, mahse, sorkar kalpui tak tak chu Prime Minister Narendra Modi tan chona nasa tak a ni dawn a ti.
NDA chungchangah zawhna a neih thu sawiin Chandrababu Naidu leh Nitish Kumar te ang an tel ve chuan an alliance chu a inthlak danglam a ni a ti bawk a.
“Vawiinah NDA an thlawp ang a, naktukah min lo zawm thut thei” tiin Rajya Sabha MP chuan a sawi a, JD(U) leader te chuan BJP te Agnipath Scheme chu an duh loh thu an sawi der tawh a chu mai bakah Uniform Civil Code(UCC) pawh sawiho an ngiat nghal bawk a ti.
Raut chuan senior JD(U) leader K.C. Tyagi leh Telugu Desam Party supremo Naidu te chungchang sawiin, “Political campaign neih laia PM-in a sawi apiang UCC emaw Agniveer te emaw an allies te atangin an dodal zel a ni. Naktukah chuan Ram Mandir issue pawhin dodal a tawk mai thei a. Modi ngeiin INDIA aliiance ten thuneihna an chan chuan Muslim te hnenah reservation an pe ang a ti a, Naidu thung chuan reservation a duh thung. Modi an engtin nge a tih ang? Thil tam tak sawiho tur an nei a, sorkar siam an tum a, siam teh se’ tiin a sawi.
Modi leh Home Minister Amit Shah te pawh kapin Raut chuan, “BJP ten Congress nuaibo Congress mukt bharat (Congress-free India) thupui an neih laiin keinin bahumat mukt BJP (BJP majority-free) in kan siam thung” a ti bawk.
Congress leader Rahul Gandhi an stock market scam a awm tia a sawi chungchang pawh sawiin Sena (UBT) leader chuan, “Amit Shah hi share market dealing lama inrawlh reng a ni a, Home Minister a nih tirh pawh khan share market ah chetlakna a nei a, he scam ah hian a mawhphurtu a ni” a ti bawk.
Rahul Gandhi chuan Modi leh Shah te chu India-in ‘stock market’ scam lian ber tawka retail investor ten Rs 30 lakh crore an chan phahnaah inhnamhnawihah puhin chhui chian a ngiat a ni.
Maharashtra State Assembly election neih tur chungchang pawh sawiin Raut chuan, “Maha Vikas Aghadi (MVA) te chuan Lok Sabha inthlanah BJP te beiin majority kan la a, state inthlanah pawh majority neih ngei tuma hma la in seat 180-185 vel lak kan tum ang. Big brother an awm lo, kan inthlawp tawn vek. Nana Patole, Sharad Pawar, Uddhav Thackeray a ni emaw tangrualin chakna kan chang mai” a ti bawk.
Seat 288 awmna Maharashtra Assembly election chu kumin October thlaah neih a ni dawn a ni.
Maharashtra-ah hian Shiv Sena kalpeng Eknath Sinde kaihhruai leh BJP ten sorkar-na an siam mek a ni.
NDA sorkar tur Raut-a’n huphurhpui hle
