NDA sorkarin No-Confidence Motion paltlang

Lok Sabha-a Ningania NDA sorkar rintawklohna no-confidence motion chu voice vote hmanga hnehin a awm a. No-confidence motion hi Opposition tangrual INDIA tena an putluh a ni.
Vote lak a nih hmain Prime Minister Narendra Modi chuan, Opposition ten thusawi lo thei lova an phut luih hnuah thu a sawi a.
PM Modi chuan, MP te ngaihdan ka ngaithla vek a. India hian keimahniah rinna a nghat zel a ni. Opposition tena no-confidence motion an pulut hi pathian malsawmna niin ka ngai a. Kum 2018 khan no-confidence motion an pu lut tawh a, kha mi tum khan sorkar tana fiahna ni lovin opposition te tana fiahna zawk a ni ka ti tawh.
Vote lak a ni a, an tlem ngei reng a. Chumi hnuah inthlan a awm a, mipui ten opposition te lakah confidence an neih lohzia an lantir zui a. NDA leh BJP te chuan vote tam zawk an hui belh a ni.
Opposition te no-confidence motion hi kan tan chuan vanneihna a ni a. NDA (National Democratic Alliance) leh BJP te nasa zawka chakna chang tura in duhna niin ka hria, tiin PM Modi chuan a sawi a.
Nangni opposition te hian mirethei te riltamna in ngaihsak lo, in thuneihna chauh in ngaihtuah zawk a. |halaite hma lam hun in ngaihtuah lova, in hma lam hun chauh a ni in ngaihtuah zawk ni, tiin PM Modi chuan a sawi bawk.
Opposition ten fielding an siam vek a, mahse, four leh six te chu keini zawkin kan vua a, century kan vaw kai reng zawk a, anni chuan no ball an vawm an vawm mai a ni. Kum nga in lo let leh theih nan hun ka pe che u a, enga tinge in inpuahchah loh? tiin PM Modi chuan zawhna a siam bawk a.
Opposition party lian ber leader chu thusawi tura dah a ni lo a, kum 1999 no-confidence motion ah khan Sharad Pawar an hma a hruai tawh a. Kum 2003-ah Sonia Gandhi-i’n hma a hruai a. Kuminah Adhir Chowdhury lakah eng nge thleng? A party berin a tawng an remti lo a ni.
Eng nge in tihluihtir ka hre lo va. Eng vangin nge Adhir Chowdhury hmaiha a awm le? Kolkata atanga lokal a nih vang a ni em le, Adhir Chowdhury hi kan lainat a ni, tiin a sawi bawk a.
Opposition-te chuan he ram chanchin tha hi an ngaihtla thei lo, tia sawi bawkin PM Modi chuan, kum 2014 khan kum 30 hnuah India mipuite chuan sorkar full majority an pe a. Kum 2018 khan nasa zawka thuneihna chang turin min hlangkai leh a ni, a ti bawk a.
|halaite hnenah corruption-free government kan pe a. Sang taka an thlen theih nan hun remchang kan pe a. Chutih laiin opposition ten eng nge an tih? Mipuite rinna tihchhiat in tum a ni, tiin a sawi bawk.
IMF in DBT (direct-benefit transfer) mak tiin a fak a. WHO chuan India-in Jal Jeevan Mission hmangin nuai tel a hum a ti a, WHO in Swachh Bharat Abhiyan a zirchiannaah nuai thum a hum a ti bawk a.
Opposition te thisen leh ruh hi rinhlelhnain a khat a. Opposition te hian banking system a tawp dawn an ti a, mahse public sector bank ten net profit a let hniha tam an nei thung.
Puhna tam tak an kalpui a, HAL (Hindustan Aeronautics Ltd) chu tluchhe derah chhuahin an duh ber chu HAL tlachhia a ni a. LIC a tawp ta tia sawiin miretheite sum thehthangin a awm an ti a, mahse, vawiin hian LIC chu a hma zawng aiin a chak tha zawk a ni, a ti bawk a.
An auhla pui ber chu ‘Modi i thlan kan lai’ tih a ni a. Opposition tena insitution an beih apiang lakah an vanduai zawk zel a. Heng mite hian he ram theihnaah rinna an nghat lo. Ka sawi tawh angin term thumna kan hman hunah chuan India chu khawvela economy lian ber pathumna a ni ang, tiin a sawi bawk.
Kum 1991 khan India chu bankrupt mai thei dinhmunah a ding a. Mahse, kum 2014 hnu chuan India chu khawvel huapin top five-ah a inhlangkai hman a ni. Congress te chuan mitdawivaih hmanga thlengah an ngai mah a. Mahse, ‘reform, perform leh thawhrimna hmanga thleng a ni’ tiin a sawi bawk a.
Bengaluru-ah hmanhmawh takin UPA vuiliam turin in kal a, uina thu sawi tur talin min sawm tur in nia. UPA chu phumin thil chhe tawh chu plaster tharin rawng in hnawih thar a, kum sawm chuanga upa tawh car chu EV anga chhuah in tum a ni, a ti bawk.
Manipur chungchang a sawi dawnin Opposition MP-te chuan house atangin an chhuah tauhsan thung a ni.