BJP kaihhruai National Democratic Alliance-a tel party ho thutkhawmah thusawina hun an pe duh ngai lo tih Mizoram MP C Lalrosanga chuan a sawi.
Thawhtannia MNF office, Mizo Hnam Runa inkhawmah Lok Sabha MP C Lalrosanga chuan Lok Sabha inthlan puan a nih hma in ‘Citizenship Amendment Act’ rules an peihfel thawkhat tawh avangin, implement ngei an tum nia a lan thu sawiin, Zoram mipuiin rilru kan lo siam lawk a tul hle tih a sawi.
Parliament-ah BJP/NDA chu an duh ang bill siamin an pass pawp pawp a. Manipur chungchangah thusawina hun pek ve a ni loa, an zawhna chhan a ngailoa, NDA meeting-ah pawh thusawina hun an pe duh loa, all party meeting-a an thusawi ve pawh engah mah an ngai lo tih a sawi.
“House-ah thusawina hun min pek duh loh avangin media-ah kan auchhuak vak thung thin a. Hnam thila nghet taka kan din a, huai taka kan auchhuah avang khan, vawiin thlengin ka la inchhir lo,” C Lalrosanga hian a ti. Kum 1950 hnulamah 17th Lok Sabha chu thutkhawm tlem ber tum niin, sitting neih tumin inau buaiin hun an hmang zo deuh zel a. Thusawina hun chan a harsa hle tih a sawi a ni.
Lok Sabha MP a nih chhungin state sawrkar thil bakah state leh mimal harsatna tamtak an buaipui ve thin a. Inbiak pawhna leh inkal pawhna a ngaipawimawh a. Ramria inbiak pawhna tha lo chungchangah pawh hma lak mek a ni tih a sawi.
“Party, ram leh hnam leh mipui tana theihtawp kan lo chhuah venaah hun harsa leh khirh tak tak kan paltlang fo a. Pathianin min hruai zel thin. MP inthlan awm turah, mifel, tha leh thiam zawkte kianin, kan hotute hnenah chawlh ka dil a ni,” a ti.
NDA thutkhawmah thusawina hun min pe duh ngai lo – C Lalrosanga
