North Eastern Council Plenary vawi 73-na chu Union Home minister, NEC chairman Amit Shah hoin Ningani khan Shillong-ah neih a ni a. Chief minister Lalduhoma chuan Ministry of DoNER hnuaia convener a nihna, High Level Task Force on Northeast Economic Corridor (NEEC) Final Report bu chu chairman hnenah hian a thehlut a, thu a sawi bawk.
Chief minister chuan, Prime minister-in India hmarchhak bial tana a hmathlir Act East a tha hle a, nakin lawka India ram hmasawnna thlentu bulpui ni thei khawpin hmarchhak bial awmna a remchang a, natural resource, mipui, culture lam thlengin theihna leh ropui danglamna bik a nei tih a sawi.
Connectivity-ah kan zaa mamawh thlir a “One-Grid Approach” hmanga kalpuiin, kawngpui, railway, air link, waterway, power, telecom leh logistics chu a ruala hma sawn tir theih a tha tih a sawi a. Kaladan Multi- Modal Transit Transport Project a puitlin hnaih avangin kawng hrang hranga inbuatsaihna – investment leh trade-a inpeih, skill development leh entrepreneurship lama hma sawn, ramri bulhnai tihchangtlun leh logistics hub, a hrut tel tur mipui vantlangin inpeih taka an lo hmachhawn theihnan DoNER ministry-in hma lakpui se tha a tih thu a sawi a ni.
Chief minister hian Mizoram chu “Ginger Capital of India” a puan a nih avang leh Mizoram Ginger USP Project avangin lawmthu a sawi a. Thenzawl Peace City ruahman mek chu tourism, education, health, sports leh agro- based development hmunpui ni chho thei tur a nih avanga tihhlawhtlin ngei a tul tih a sawi.
HLTF on NEEC Report a thehluh chungchang sawiin, he ruahmanna anga hmalak a nih chuan, India hmarchhak state-te inkalpawhna, tourism, investment, trade and logistic chu tum thuhmun nei takin a kal dawn a, kan hlawkpui vek dawn a ni, a ti.
73rd Plenary hi Union Home minister-in a kaihruai a, DoNER minister Jyotiraditya Scindia, minister of state for DoNER Dr Sukanta Majumdar leh hmarchhak state chief minister-te leh official-te an tel a ni.
Chief minister thusawi dang:
8 Investment-ah project hrang hrang kalpui thluah loin, kan zaa mamawh thlirin a hlawm emaw a inzawm (cluster) a kalpui a tha a. Investment kalpuina atana tha – mau, agri-horti value chain, food processing, textile, eco-tourism, green energy leh digital service-ah chutiang chuan kal nise kan zaa kan chhawr tlan a beiseiawm.
8 Tourism chu hmarchhak pumpui circuit pakhat anga common branding leh facilitation neia hmasawntir a tha ber a. Trade leh logistics pawimawh dan a inang reng a, Act East Policy leh India -Myanmar- Thailand Trilateral Highway hmangin hmarchhak chu logistics leh trade gateway atan siam theih a ni.
8 North East tana ruahman 10% Gross Budgetary Support chu a hming maia kalpui loin, tha takin kalpui thei ila. DoNER emaw NEC hnuaiah ‘coordination mechanism’ siam nise.
8 Thalaite hi kan resource pawimawh ber an ni a. Chuvangin, skill development, incubation, tourism & hospitality, logistics, agri-business, green technology leh start-up ecosystem lamah nasa zawka chher an ngai.
8 DoNER hnuaia project approval a chak zawkna atan state tinah Project Implementation Unit din ni thei se.
NEC Plenary-ah hmarchhak tana tangkai tur chief minister-in thlen
