NEDFi, North Eastern Council (NEC) leh Ministry of Development of North Eastern Region (DoNER) te tangho buatsaihin NEC Vision 2047 chungchang ngaihtuahin Thawhtanni khan State Level Consultative Committee an thukhawm.
Planning & Programme Implementation addl secretary Irene Zohlimpuii Chongthu chuan NEC Vision 2047 tum tihhlawhtling turin sawrkar, private sector, khawtlang leh stakeholder dangte tanrual a ngai tih a sawi a. Entrepreneurship tihhmasawn nan inkaihhruaina zamte ngaihtuah nawn leh a tul, tiin, Myanmar leh Bangladesh nen ramri kaltlanga insumdawntawn kawngah Mizoramin dinhmun pawimawh tak a chang tih a sawi. Thalaite entertainment sector, a bikin film leh music lamah thuk zawka an luh mek thu a sawi bawk.
NEC senior economic adviser Sherry Lalthangzo chuan thil tam tham zawk hmundanga thawn chhuak tura tan lak a tul thu leh vawksa leh thildang siam chhuah tihpun a tul thu a sawi a. Matabari Deep Sea Port chhawr tangkai theih dan tur a sawi. NIPER kaltlanga thlai chi hrang hrang siamchhuah tuma hma lak a ni tih sawiin, NEC chuan loneitute leh ei leh in siamna sector tana marketing pui turin NE RACE platform a tlangzarh tih a sawi a. DoNER-in investment ti theite hip tumin investment summit a buatsaih dawn tih a sawi bawk.
NEDFi executive director SK Baruah chuan Vision 2047 document siam turin mithiam 34 leh core member 4 awmna committee-in sawrkar laipui leh state ho rawn chunga hma an lak thu a sawi a. Ruahmanna siam turin thawhho that a pawimawh tih a sawi
Drafting Committee core committee member Prof KM Bujarbaruah chuan NEC Vision Plan 2047 chungchang a sawifiah a. Mizoram sawrkarin ngaihdan a thawhte a sawi bawk. Sawiho zui niin, sawrkar department, zirna in, bank, sumdawng, entrepreneur leh civil society organization-te an tel a ni.
Hemi hnu hian NEDFi team hian chief minister chu hmuin vision document chungchang an hrilhfiah a, draft copy an hlan a ni.
NEC Vision 2047 sawi ho
