Nepal-in social media khapna a hlip

Nepal-in social media khapna a hlip
Nepal chuan mipuiin an duh loh leh nawrhna an huaihawta police nena an innawrna avanga mi 19 an thihna leh mi 100 chuang an hliamna, social media an khapna chu an hlip ta.
Khap a nih hma hian ‘nepo kid’ campaign tia an sawi, politician tu leh fate hautak taka an khawsa leh ei rukna a nasa tia sawina a tam hle a, heng thehdarhna social media hi khap zui a ni.
Sorkarin Facebook leh YouTube tela social media platform 26 a khap hnuah Thawhtanni khan thalai sang rualin duh lohna lantira pungkhawmin an khawpui, Kathmandu-ah chuan parliament an luhchilh a. District tam takah curfew puan a ni.
Minister chuan Thawhtanni zana thutkhawm hmanhmawh an kohvah ‘Gen Z thil phut tihhlawhtlin a ni’ tih a sawi zui.
Kar hmasa khan communication & information technology ministry-a hun tiam chhunga inziak hman lo social media platform 26 chu sorkar hian a kap.
Zirtawpni atang khan a hmangtu thenkhatin an hmang thei lo tan a. A hnuah platform pahnih chu ministry-ah a hnua inziak lut lehin hman leh theih a ni.
Sorkar chuan social media platform-te hi chanchin thar dik lo, inhuatna leh online-a intihderna tam lutuk tihziaawm nan thunun (regulate) a ngai niin a sawi.
Hetih lai hian Instagram telin platform hrang hrangte hi Nepal-ah hian mi maktaduai telin hmangin hlimhlawp, chanchin thar leh sumdawnna atan an hmang nasa hle.
Generation Z tia invuah thalai rual sang tel chu Thawhtanni khan Kathmandu leh hmun dangah an pungkhawm a. Placard an keng a, an au hlaah ‘a tawk tawh em em’ tih te, ‘ei rukna tawp rawh se’ tih te pawh a tel a. An zinga thenkhat chuan sorkar chu mi mal thuneihna hawiin an kal ta lutuk niin an sawi bawk.
An zinga thenkhat chuan Damak-a Prime Minister KP Sharma Oli-a in pawh lungin an vawm nia sawi a ni.
Communication Minister Prithvi Subba chuan police-in a hnawh darh nan tharum an hmang tih a sawi a. Tuiin an phuh a, tiangin an vua a, thelret silaimuin an kap bawk tih a sawi.
Prime Minister Oli-a chuan tharum thawhna a thleng leh thi an awm teuh chu ‘a pawi tak zet’ tih a sawi a, khatiang thil kha ‘tute emawin buaina a chhuah nan thil an phiar’ niin a sawi bawk.
Sorkar chuan lungawi loh lantirnaa thil thlengte kha a chhui tur committee a din a, a tuartu chhungkuate pawh ‘chhawmdawlna’ pein hliam tuarte pawh a thlawna enkawl an ni ang tih a sawi.
Home Minister Ramesh Lekhak-a chuan Thawhtanni zan khan bânna a thehlut a, a enkawl police-ten mipui laka tharum an hmanah an sawisel nasat avangin a mawhah ngaiin a bâng a ni.
Kathmandu Valley Police thupuangtu, Shekhar Khanal-a chuan an khawpuiah hian mi 17 thah an nih thu a sawi a. Khawchhak lama Itahari khawpuiah pawh mi pahnih thah an ni tih tual chhung police-in an sawi bawk.