Zirtawpni kalta zanlai vel khan Nepal ramah chuan lir a nghing a, a tlem berah mi 157 velin nunna an chan tawhin bungrua tamtak a ti chhia a ni. Lirnghinna hmuna sorkar thuneitute chuan Inrinni zinga an dinhmun buaithlakzia leh he chhiatna buaipui nana hmanrua an tlakchham te chuan buaina a belhchhah nasat thu an sawi a ni. He lirnghing hi Kathmandu thlang lam 500 Km vela hla Jajarkot district atanga rawn intan niin Zirtawpni zanlai thlen hma lawka lo thleng niin an chhinchhiah a ni. He lirnghing hian tlang rama in tamtak te chu a tichhiaa mipui tamtakin kawtlai ah Inrinni zan te kha hun an hmang liam vel mai mai a ni. Mitthi 157 te zinga 120 te chu an chhungte hnenah hlan an ni a, mi 253 vel te chuan hliam an tuar a ni. He lirnghing hi kum 2015 hnu lama lirnghing-in chhiatna a thlen nasat ber tum a ni. Nepal Prime Minister Pushpa Kamal Dahal ‘Prachanda’ chuan Cabinet meeting ko nghalin he lirnghing-in thil a tih chhiat leh dam khawchhuakte tanpui dan tur an rel dawn a ni.
Nepal sorkar chuan Inrinni khan sawiin chhanchhuahna hna thawk tur leh mi bo te zawng tura ram dang tanpuina beisei nan chuan a la hma deuh ti a sawiin, an mahni-in a tul ang anga chhanchhuahna hna leh tanpuina sem zai hna te, abik takin Jajarkot leh West Rukum districts ah te hma la tura a inbuatsaih thu a sawi a ni. He vanduaina chhuah hnu lawk hian Nepal ram thenawm India, China leh United States te chuan riahbuk remchang tur te, hliam tuar leh mi bo zawn hna thawk turte in chhanchhuaktu tur mi thiam te an tir lut nghal a ni. “Ram dang atanga tanpuina dawng thei turin thutlukna kan siam vat a ngai a ni. Hemi tur hian Pathianni zingah Cabinet meeting neih nghal a ni ang a, chhanchhuah hnathawh leh inenkawl zuina mumal tih chak nghal a ni bawk ang,” tiin Nepal PM chuan chhiattawhna hmun a tlawhna ah a sawi a ni. Nepal sorkar chuan Inrinni tlai khan blankets te, thuamhnaw leh ei tur chi hrang hrang chhiat tawhna hmunah a thawn nghal a, agencies hrang hrang atanga tanpuina lo kal te semzai dan tur pawh ngaihtuah nghal a ni bawk.
Harischandra Sharma, assistant chief district officer, Jajarkot chuan, “Hospital-in hliam tuar te enkawl turin mihring leh hmanraw mamawh duhthusam a awmlo. Kan harsatna te su kiang turin inrinni kan nghak tawp mai a ni,” tiin an buai dan a sawi a ni. Kathmandu leh Surkhet atangtein Doctors te leh medical team te an rawn thlen belh zel avangin harsatna zualpui pawh an sukiang chawp ve zel a ni. National Earthquake Monitoring and Research Center, Lainchaur atangin lirnghing lama mithiam ten lirnghinna hmun Jajarkot an thleng tawh a, an ni hian zirchian zawkna neiin thil awmdan chiang zawk an la rawn sawi tura ngaih a ni.
Nepal lirnghing vanga thi 157
