Thawhtanni Euro 2024 qualifying match pakhatah Liverpool defender Virgil van Dijk chuan penalty atanga goal khungin mualneitu Greece lakah sikhat faiin Netherlands a chakpui a, hun pekbelh minute 93-a a penalty chhuihluh kha Sep-tember 2022 hnu lama ram tana a goal thun leh vawikhatna niin, Euro 2024 khelh phak an tumna kal mekah goal pawimawh a ni.
Van Dijk hian box chhunga Denzel Dum-fries hlawhchhuah penalty chu goal-ah chantirin, Athens khaw-puia an point thum hlawhchhuah hmangin Holland hian Group B-ah pahnihna an luah chho a; an hnuai chiaha pathumna dinhmun luahtu Greece lakah hian vawihnih chak tawhin, head-to-head tehnaah an sang zawk a, pahnihnaah an thu.
Qualifying game hnih khelh tur an la neihah Republic of Ireland leh Gibraltar hneh ve ve se Dutch hian an group atanga tlang tawh France hnungzuiin nakkum nipui thawt laia Germany rama khelh tur Europe tournament lian hi an khel thei dawn a, mahse, an hmabak hi a la hraw viau a ni.
Greece hian khelh khat chiah nei tawh thungin, thla thar hian France an mikhual ang.
Thawhtannia an chak loh tumin Greece coach Gus Poyet chu referee thutlukna a sawisel nat avangin red card hmanga hnawh-chhuah a ni.
Tarlan tawh angin, Group B atang hian hmahruaitu France an qualify tawh a, Nether-lands hian khelh ruk atanga point 12 hum chungin pahnihna an luah a, an hmabak a la ko kan tih rualin an tum leh tur pahnih Ireland leh Gibraltar hi team khawng an ni lo a, an record leh ranking atanga teh phei chuan Dutch-ho hi chak tur chiangsaa ngaih an ni.
An group inkhel dangah Ireland chuan 4-0 tehrengin mualneitu Gibraltar an sawp a; goal khungtute chu rawlthar Evan Ferguson, Michael Johnston, Matt Doherty leh Callum Robinson-te niin, Thawh-tanni zanah point thum thawkchhuak mah se an tan qualify ngaihna a awm tawh lo.
Netharlands chakpuitu Van Dijk
