Netherlands leh Turkey an tlang ve leh

July 2, Thawhleh zan khan Euro 2024 last 16 khelh zawh a ni a, Netherlands leh Turkey ten hnehna changin quarter-final an lut ve leh. Netherlands hian 3-0 ngawtin Romania an sawp a. Turkey in inelna neih meka khel tha tak Austria an hneh nawlh a, Euro-ah a vawi khat nan quarter-final an lut. Netherlands leh Turkey te hian semi-final luh an inchuh zui leh ang
Netherlands an vannei
Player tha tak tak nei chunga beisei phak lo, khawvela defender tha ber ber nei chunga an tlarhnung phui chuang lo Netherlands in last 16-ah Romani ber kher an hmachhawn hi an vannei hle. Romani hi Group E atangin tlang nawlh mah se Fifa ranking-ah an chung 42-na daiha awm Netherlands hneh tur em chuan an lian tawk lo. Tunhnai an intum hnuhnung vawi thumnah pawh si thum chinin an tlawm ziah a, hei vang ngawt pawh hian an tan Dutch ho hi ngam loh ena en na tham a tling sa. Inkhel a zawh hnuin Romania an hmachhawn vanga Netherlands vanneihna nem nghehin a awm.
Fußball Arena München a inkhelah Netherlands in an khingpui Romania an ngamin, an hneh hle a, an khingpuite hian an chhaihbuai pha meuh lo. Kawng hrang hrangin Netherlands hian an khingpuite an hneh viau a, goal pawh an thun har lo. Ram tana chetha thei tak Gody Gakpo chuan vei lam sir atangin ball a la lut a, angle chep tak karah fuh zeta pet goal in, minute 20-naah hmahruaina goal a thun. Gakpo hian inelna neih mekah goal thum a thun tling ta chiah a, top scorer zingah a tel mek. A goal thun pakhat pawmsak ni se goal li thun thei awmchhun ni tur a ni a, VAR hmanga ennawn a nih hnuin a goal hnihna hnawlsak a ni hlauh thung. Liverpool forward Gakpo hian major tournament-ah Netherlands tan vawi 10 a khel tawh a, goal 6 lai thun tawhin, hnuhma a nei tha hle.
Hmahruaina goal an thun hnuin Netherlands an khel tha chhunzawm a, na taka an khingpuite nawrin hlauhawm pawh an nei nual. Goal thun theihna hun tha nei bawk thin mah se goal bulah an hlauhawm hleithei lova, inbal buaiin, an hun tha neih chu holam takin an khawhral leh mai thin. Goal tam zawk thun thei an ni chungin chawlhlawk hmain goal an thun belh thei lo.
Dutch manager Ronald Koeman chuan second half-a mual chhung an luh rualin player a thlak a, Donyell Malen a luhtir. Champions League final-a Borussia Dortmund hruai thlengtu Malen hi a chetha zui hle a, goal hnih a thun hial. Second half-ah pawh Netherlands in inkhel a thunun chhunzawm a, Romania in an chhaihbuai phak chuang lo. An khingpui lakah chungnung viau mah se goal thun erawh an harsat. Gakpo goal hnawl a nih leh zet hnuin hun tawp dawn hnaihah an che fuh a, goal hnih an thun ta hlauh.
Man of the match’ a thlan zui tak Gakpo chuan fuh zeta ball a lak tlang hnuin Malen tan tha zetin a chhawpsak a. Bench atanga lut Malen hian awlsam taka pet goal in minute 83-naah an goal hnihna a thun a, an hmahruaina a tizau. Team lian zawk leh inkhel thunun hneh tak Netherlands in si hnih faia hma an hruai vangin chak tur zawk a chiang viau tawh. Quarter-final an lut ngei dawn a ni tih chiang tawh mah se Ronaldo Koeman-a team ten an la duhtawk lo va, hun tawp dawn tepah goal an thun belh leh. An goal hnihna thuntu Malen chuan minute 90+3-ah an goal thumna thunin a tawp a khar a. Romania lakah 3-0 a hnehna changin quarter-final an lut ta a ni.
Netherlands an insiamtha em?
Team lian, champion tura rinkai zinga mi ni chunga beisei phak lo Netherlands chuan Romania sawpin quarter-final an lut ta a. Romania lakah 3-0 a hnehna an chan kha Ronald Koeman-a team te an insiamtha taah ngaih tur a ni em tih erawh inhnial theih tak a ni zui thung.
Group Stage-a an khelh dan ngawt ai chuan Netherlands hian an khel tha ngei mai a, goal thum lai an thun. Chutihlai chuan Romani khan an khan lo em mai a, kawng tin rengah an ngam lo a ni tawp. An khingpuiten ngam lo viau mah se khel tha tia sawi hluai tur erawh an ni chuang lo. Box chhungah ho tak takin ball an hloh a, goal thun theihna turah an inpal buai fova, hlauhawm tur hlauhawm lo takin an chhuah fo. An striker Memphis Depay a che nawi tluan a, free kick leh corner chhuihtu Depay hian chhuih that a nei mang lo bawk. Romania kha Netherlands tan fiahna a tling phak lova, team lian an hmachhawn hmuh a chakawm. Quarter-final-ah group stage-a an hneh loh Austria an pumpelh hlauh a, Turkey zawk an hmachhawn leh tur erawh an vannei tluang niin a ngaih theih ang.
Turkey an chak nawlh
Netherlands leh Romania an inkhel zawh hnuin an hmaa ding tur zawnnaah inelna neih meka khel tha pahnih Turkey leh Austria te chu Leipzig Stadium-ah an inhmachhawn zui ve leh. Inkhel hmuhnawm takah Turkey chuan team hmuhnawm Austria chu 2-1 in an hneh nawlh a, Netherlands hmachhawn turin quarter-final an lut.
Leipzig Stadium-a inhmachhawn Turkey leh Austria te hi player langsar fal, ‘super star’ tia sawi hluai tur nei lo, player tha vangtlang tak tak an ni hlawm a. Player langsar chetla chauh en duh tan chuan an inkhel hi en chhan tur a awm kher lo ang. Inkhel hmuhnawm, game inhawng leh team inngamtawk hmu duh tan erawh hmaih phal loh inkhel hmuhnawm tur a ni thung. Rinlawk ang ngeiin inkhel hmuhnawm an lantir a, a bul atanga a tawp rat thlengin a hmuhnawm tluan thak.
Game nung tha takah hian Turkey in bul an tan tha viau a, minute 1-na lekah goal an thun nghal. Corner atanga ball kal chu Merih Demiral chuan chiang zetin a pet goal a, hmahruaina goal a thun. Goal lut a awm belh theih loh reng hnuin Demiral hian minute 59-naah an goal hnihna a thun belh leh a, an hmahruaina a tizau.
Austria hian an si phurh sut ngei tumin an nawr chiam a, Michael Gregoritsch chuan minute 66-naah an si phurh a sut then. Goal thun belh theihna hun tha nei zui bawk mah se si nghak Mert Gunok an paltlang thei tawh lova an si phurh an sut zo thei lo. An hun tha an hlah zel vangin Turkey lakah uiawm takin an tlawm a, ui tak chungin Euro 2024 chu an mangtha a, an puanthuah an tel zui ta a ni.