Netherlands manager Koeman a bang

World Cup last 32 match pakhata Morocco an hneh loh hnuah Ronald Koeman chuan Netherlands manager a nihna a chawlhsan thu a puang.
Thawhlehni zinga Monterrey khawpuia inkhelah extra time zawh thlengin Dutch-ho khan 1-1 an kalpel zo lo a, penalty petah vanduai zuiin, African team lakah 3-2-in an tlawm a, last 16 nan lut zo lo.
A hnu lawkah kum 63 mi Koeman chuan a tum hnihna atan an ram national team head coach nihna a bansan thu a puang a, a nupui Bartina chuan hnute cancer natna a vei mek bawk avangin a managerial career pawh a zial fel chhunzawm mai rinna a lian chho nghal.
Instagram lamah a dinhmun tarlang zui nghalin, “Ka career ka thlirkir a, ka chhuang ve khawp mai.
“Club lamah pawh ka lo thawk kual ve nual tawh a, mi chi hrang hrang ka tawnte’n tun dinhmun thleng tur hian min chher chhuak a, ka dam chhunga ka hriatreng tawh tur min thlensak bawk.
“Ka mangphan ber chu kan ramin history thar kan ziahna tur World Cup hi ni mah se kan hlawhtling zo leh ta rih lo a, kei aia pawi ti hi an awm thei bikin ka ring lo.
“Tunhnai kum liamta engemawti chhung khan ka hringnunah hian football aia pawimawh zawk a awm theih thu ka ngaihtuah ve ta fo a, football hi ka nun nena inzawm tlat ni mah se hriselna erawh suma lei zawh rual loh a ni.
“I hmangaih tu emawin damkhawchhuak tura inbeihna hautak a hmachhawn a nih chuan i thil thlir dan pawh i thlak ve ngei a ngai ang,” tiin a nupui natna avanga a buaipui ber thin football pawh a hawisan mai rin loh theih lohin thuziak a hnutchhiah.
Morocco laka an tlawm hnu khan penalty chhuihlut zo lo an mihang player pathum – Justin Kluivert, Quinten Timber leh Crysencio Summerville-te chuan social media lamah na taka beihna an tawk a; Royal Dutch Football Association (KNVB) chuan he’ng mite hian inthliarna, huatna leh an chi avanga beihna an tawk tih thuchhuah siamin an tarlang a, an player-te laka chuti ang lantirtute chu zuah an tum loh thu leh thubuai (criminal charge) pek ngei an tum tih an tarlang tel.
Kum 2021 European Championship final-a penalty an chhuihluh loh tum pawh khan England mihang player pathum – Marcus Rashford, Bukayo Saka leh Jadon Sancho-te pawhin uchuak taka diriam an lo tawk tawh a, an laka inthliarna lantirtu pahnih chu lung ina khung niin, pakhat pawh na taka warning pek a ni.