Commerce department hnuaia Aizawl bazarpui, New Market building thar sak mek chu nakum kumtir lamah zawh hman tum a ni tih Commerce minister Dr R Lalthangliana chuan a sawi.
‘Aizawl City Centre Annexe’ tia hming vuah he market building hi cheng nuai 3641.59 senna tur niin, a bulah hian UD&PA hnuaiah Aizawl Smar City project kaltlangin bazarpui tihchangtlunna tur building sak thar mek a ni bawk tih Dr R Lalthangliana hian sawiin, an ni department hmalakna nen erawh hriatpawlh loh tur a ni tih a sawi.
Hemi hma hian Commerce department kaltlang thoin Aizawl New Market building tha tak cheng nuai 1300 senga an sak zawh tawh thu a sawi bawk.
Commerce & Industries department chuan kum 5 chhungin balu, lung, leirawhchan leh a dangte lakna leh siamnaah, sawrkar sumbawma chhunluh turin chhiah Rs. 34,24,54,940 a hmu tih minister hian a sawi.
Mizoram leh Bangladesh insumdawn-tawnna tur Border Haats dinna atan Silsuri Mamit district-ah hma lak a nih mek thu sawiin, Bangladesh Commerce minister Tipu Munshi nen a hmun an tlawh tawh a. Insumdawn tawnna tur hi bawhzui zel a ni tih a sawi a ni.
Lunglei Super Market Annexe chu cheng nuai 270 senga sak zawh a nih thu leh Lunglei Market and Trade Centre chu cheng nuai 1403 hmang a sak mek a nih thu a sawi a. Land Custom Station Zokhawthar tih changtlun hna chu cheng vaibelchhe 15 hmanga thawh mek a nih thu sawiin, ICP Kawrpuichhuah fencing chu thawh zawh a nih thu a sawi bawk.
New Market building sak zawh tum hun 2024 kumtir
