Zanin dar 11:15 atangin UEFA Champions League 2023 khelh chhunzawm a ni leh dawn a, Group E, F, G leh H ah chinfel ngai zawng zawng chinfel a ni dawn. Zanin inkhel tur zingah Group F in ngaihven a hlawh fal dawn a, Paris St-Germain, Newcastle United leh AC Milan te tla thei an ni a, tling thei an la ni hlawm bawk.
Group E atangin Atletico leh Lazio ten last 16 an lut chiang tawh a. An ni pahnih hi zan 1:30 ah an inhmachhawn ang a, group champion nih an inchuh ang. An mualah tlawm an pumpelh thei a nih chuan Atletico Madrid hi group champion an ni zui ang.
Group F atangin German club Borussia Dort-mund an tlang chiang tawh a, Group champion erawh an la ni chiang bik lo. Dortmund hian PSG an mikhual dawn a, an mualah tlawm an pumpelh thei a nih chuan group champion an ni ang. PSG tan Dormund hneh a pawimawh leh zual a, an chak lo a nih chuan tla thei dinhmunah an ding.
Dortmund lakah PSG an chak a nih chuan St James Park a inkhel tur Newcastle United leh AC Milan te tan last 16 luh theih a ni dawn lo. PSG an tlawm hlauh a nih chuan Newcastle leh AC Milan te inkhel a chak zawk zawkin last 16 an lut ang. Thih leh dam kara leng Newcastle hian Europa League tal khel chhunzawm tur talin an mualah chak ngei an tum hle ngei ang.
Group G lam an inching fel tawh a, champion lai Manchester City chu group champion an ni chiang tawh a. RB Leipzig chu pahnihna an ni chiang tawh bawk a. Young Boys in Europa League an khel chhunzawm ve thung ang.
Group H ah FC Barcelona an champion chiang tawh a. Point kua ve ve hmu mek FC Porto leh Shakhtar Donetsk ten last 16 luh an inchuh zui ang. Anni pahnih hi FC Porto mualah an inhmachhawn zui dawn a, Portuguese club tan an mualah chakin, last 16 luh theihna kawng zau takin a inhawng. An inkhela chak zawk zawkin last 16 an lut ang a, a chak lo zawk zawkin Europa League lasy 16 playoff an khel zui thung ang.
Newcastle tan thih nge dam
