Newcastle United in PSG an sawp

October 4, Nilai zan khan UEFA champions League 2023-24, group stage khelh chhunzawm a ni a. English Premier League club Newcastle United chuan French champion Paris St-Germain chu 4-1 ngawtin an sawp. Newcastle in PSG an sawp lai hian Manchester City pawhin hnehna an chang ve bawk.
Kum 20 hnuah hnehna lawmawm
Newcastle United hian St James Park-a an mikhual Paris St-Germain lakah bul an tan tha hle a. Inkhel tan atanga minute 17 na lekah Miguel Almirón chuan hmahruaina goal a thun. Team lian lakah hma taka goal an thun hian inrintawkna sang zawk a pe a. An tualzawlah phur takin an inlan zui theih phah. Hma takah goal chhuah mahse Kylian Mbappe leh a khelhpui ten goal an thun thei mai lova, chawlhlawk hmain goal an chhuah belh leh.
Si khat faia hmahruai Magpies hian na takin an mikhualte an nawr zui a, an khel tha zui hle. Minute 39 naah Dan Burn chuan an hmahruaina tizauin, an goal hnihna a thun a. Si hnih faia hmahruai chungin chawlhlawk an hmang.
Chawlhlawk hnu lamah Newcaslte an khek ?ha chhunzawm zel a, PSG an che hleithei meuh lo. Na taka an mikhualte an nawr rah an seng a, minute 50-na lekah Sean Longstaff chuan an goal thumna a thun zui leh a. Darkar khat em pawh an khelh tlin hmain French Ligue 1 champion lalah goal thum an thun hman der.
Si thum ngawt an phurh hnuin PSG in goal thun ngei an tum a, phurh belh huamin an khingpuite an nawr a, an hlawhtling ve ta nge nge. Minute 56 naah Lucas Hernandez chuan goal thunin an si phurh a sut then. Goal an thun hnuin PSG an phur thar a, goal thun belh tumin an khingpuite an nawr nasa hle. Goal thun belh tuma ?an an khawh laiin goal an chhuah belh leh ta tlat thung. Hun tawp dawn hnaih minute 90+1 ah Fabian Schär chuan an goal lina a thun a, an chakna a nem nghet. Schar goal thun hnu hian goal dang a luh belh thei tawh lova, Newcastle United chuan an mikhual PSG chu 4-1 ngawta sawpin, point thum hlu tak an hmu.
Newcastle United hi kum 20 dawn hnuah an mualah European Competion an hmachhawn lehna hmasa ber a ni. An mual European competiton an hmachhawn hnuhnung ber 2003 khan Barcelona lakah si hnih faiin an tlawm a, Nilai zana an mikhual PSG erawh chu 4-1 laiin an sawp ta thung a. St James Park a pungkhawm mipuite chak lawmin an sahawk nasa hle.
Nilai zana inkhel dangah Borussia Dort-mund leh AC Milan te goal awm lovin an inhnehtawk. Dortmund leh Milan an inhnehtawk vangin Newcastle Uni-ted hian khelh hnih a?anga point li hmuin Group F ah hma an hruai a. Point 3 hmuin pa-hnihnaah PSG an awm a. Pathumnaah AC Milan awmin, palinaah Dortmund an awm mek.
City an chak tlai
Nilai zan hian champion lai Manchester City chuan German club lian RN Leipzig an hmachhawn a. Hun tawp dawna Julian Alva-rez leh Jeremy Docu te goal thun hmangin hneh na an chang a, point thum an hmu.
Red Bull Arena a lenglut City hian bul an tan tha a, minute 25 naah Phil Foden chuan hma-hruaina goal a thun nghal. Goal thun thuai mah se goal dang thun belh turin an nghah rei ngai viau thung. Mual-neitu RB Leilzig pawhin an si phurh sut tum viau mah se, chawlhlawh hmain goal an thun thei bik lo, si khata hnufual chungin chawlhlawk an hmang.
Chawlhlawk hmain goal thun thei lo mah se, chawlhlawk hnu lamah RB Leipzig in goal an thun ta thuai thung. Second half tan atanga minute thumna lekah Lois Openda chuan goal thunin an si phurh a sut.
Goal khat ve ve an thun hnuin team hnihte an inawr tawn nasa viau a, goal thun thei an awm lawk lo. Hun tawp dawn hnaihah champion lai City an che fuh a, minute 84 naah bench atanga lut Julian Alvarez chuan hma an hruai nawn lehna goal a thun.
Hnufual zawka an tan nawn leh hnuin RB Leipzig in goal thun ngei tumin thapui an thawh thar leh a, goal thun an tum luatah an chesual a, goal an chhuah belh leh. Minute 90+2 ah Jeremy Docu chuan an goal thumna a thun a, an chakna a nem nghet. Tichuan, Red Bull Arena ah 3-1 a hnehna changin City chuan point thum an hmuh belh leh ta a ni.
Group G atanga inkhel dangah Young Boys leh Red Star Belgrade chu 1-1 in an inhnehtawk. Ti hian, vawi hnih theuh an khelh atangin Manchester City in point 6 an hmu a, hma an hruai mek a. Point thum hmuin RB Leipzig in an dawt. Young Boys leh Red Star Belgrade ten point khat ve ve an hmu mek a, a hnuai lam an luah dun.