English Premier League club Newcastle United chuan kum 2022-23 season chhung khan pound maktaduai 73 zet an hloh tih an puang. Hrem an tawh loh nan Newcastle hian an player an hralh nual a ngai dawn niin a lang.
English club hlun, hlawh-tlinna hrang hrang lo chang tawh Newcastle United hian kum 2021 khan neitu thar an nei a. Saudi Public Investment Fund chuan October 2021 khan an lei. Neitu thar hnuaiah Magpies hi an inla thar nual a, hma pawh an sawn chak hle. Saudi Public Investment Fund in an lei tirh hian EPL ah 19-na daihah an la awm a, tlahniam thei dinhmunah an ding mek. Thlasik bazarah player tha tak tak an lei a, an tisual lo. 11-na niin 2021-22 season hi an khar ta hial.
Season an khar that vangin 2022 nipui bazarah an chena leh zual a, player lei nan sum an seng hnem ta viau. An sum sen hnem hi 2022-23 season-ah an hlawkpui viau a, palina ni chungin season an khar hial a. Hun rei tak hnuah Europe a inelna ngaihhlut hlawh ber UEFA champions league an hmachhawn phak ta hial a. League Cup final an lut hial bawk.
Neitu thar an neih hnu tun thlengin Newcastle hian player lei nan pound maktaduai 400 vel zet an seng tawh niin chhut a ni. Player lei nana sum an sen hnem hi khelmual chhungah hlawkpuiin thleng sang bawk mah se sum erawh an lo hloh hnem viau thung. June 30, 2023 thleng khan Magpies hian pound maktaduai 73 an hloh. An sum hloh nachhan lian ber chu player lei nana an sen a ni.
Kum 2022-23 season chhunga pound maktaduai 73 zet an hloh vangin Newcastle hian hrem an pumpelh theih nan sum an tuak a ngai dawn a. Sum an tuakna awlsam ber chu an player neih mekte hralh then a ni. An player thenkhatte hi EPL club lian bakah ram dang club te pawhin an ngaihven chho viau a, nipui bazar inhawn hunah an inhralh then ngei tura ngaih a ni. EPL ah hian sum hloh phal chin bituk a awm a. Phal chin bak sum hloh an awm a nih chuan hrem theih an ni a.
EPL club zingah bituk zat pela sum hloh vanga hremna tuar hnaivai ber chu Everton an ni a. Everton hi season kal mekah hian point 10 zet paihsak an ni a. Table mawngphahah awmin, a buai hman hle a, tunah erawh an insiamtha tawh thung. Arsenal pawh hian nipui bazarah player lei nan sum an seng hnem a. Player thar mamawh viau mah se hrem tawh an hlauh vangin thlasik bazarah player an lei ngam rih lo
Newcastle United in sum an hloh
