Aam Aadmi Party te chuan Centre-a BJP sorkar chu online news portal NewsClick an luhchhuah avangin nataka sawiselin journalist te chu ‘tihthaihtum’ tiin an sawi a.
Delhi Police Special Cell te chuan NewsClick kaihhnawihah hmun 30 an dap thut a, chung bakah chuan journalist te chenna in te pawh an dap tel zingah a tel a ni.
AAP chief national spokesperson Priyanka Kakkar chuan Modi sorkar chuan China do ang taka langin a journalist te a bei vak a, a chhan chu China a do ngam tak tak loh vang a ni.
“He ramah hian journalist chihnih an awm a- Modiji laka inpe a, ni tin Modiji-an lawmman a pek te an awm a. Chutih laiin ram tana theihtawp chhuah mek Modi sorkar diklohna pholangte an awm thung,” tiin a sawi.
“Modiji hi mi dawihzep a ni a. Awm ang lo tak takin journalists te a vau a ni,” tiin Kakkar chuan a sawi a.
China chuan Indian territory a lut a, chutih lai chuan Central sorkar chuan commercial lama inzawmna chhu chat turin huaisenna a nei lo a ti a.
“China-in kan ram a luah a, mahse Modiji chuan China sawisel turin huaisenna a nei lo. Heng journalists te man chung hian China do ang takin a inpholang a ni. I huaisen tawk a nih chuan China nena insumdawntawnnate i titawp tur a ni,” tiin a sawi bawk a.
“Vawiin hian Modiji hi China chungchangah hian a hlawhchham thak a ni. China do ang taka lang siin journalist te a bei vak ringawt,” tiin a sawi bawk.
Enforcement Directorate te chuan Newsclick te hmun hi an dap thut a, tunah Special Cell te chuan central agency te thupek angin an la bawhzui zel a ni.
Tuna news website hmun an beihna chhan hi anti-terror law UAPA kaihhnawih thil niin heng news website te hian pro-China propaganda thehdarhin sum an dawng an tih vang a ni.
Congress ten rilru lakpen tumna ti
Congress-te chuan Newsclick journalist te beiha dap thut chu tun hnaia Bihar caste survey tihchhuah boruak siam tak leh ram pum huapa caste census ngiatna laka rilru lakpen tumna thil tih a ni tiin an sawi.
Congress’ media leh publicity department head Pawan Khera chuan, “Bihar caste census leh ram puma caste census neih tum boruak kal zel laka rilru lakpen nana tih a ni,” a ti a.
“Syllabus pawn zawhna an dawng a nih chuan an syllabus- rilru lakpenna atangin an bei zui nghal mai thin,” tiin Khera chuan a sawi a.
Congress spokesperson Supriya Shrinate pawhin sorkar chu na takin a sawisel bawk a.
“Rorel lai BJP te hian Sycophants army an nei chungin journalist huaisen thenkhatte chuan thudik an la sawi ngam zel a. Mahse, Prime Minister chuan heng thudik sawitute leh zawhna zawttute lakah hian special problem a nei a ni,” tiin a sawi bawk a.
“Chuvang chuan an dap thut thut a, an inlek khum mek a ni,” tiin Shrinate chuan a sawi bawk.
Nitish Kumar sorkar chuan Bihar-ah nghahhlelh tak caste-census chu kum 2024 Parliamentary election hmain an tichhuak a, hetah hian OBCs leh EBCs te chuan state population atangin 63 per cent lawih an lo awh a ni.
INDIA in dem
Indian National Developmental Inclusive Alliance (INDIA) party te chuan thuchhuah siamin NewsClick journalist te dap thut chu an dem thu sawiin BJP te chuan investigative agencies te chu rah beh an tum a ni tiin an sawi.
“Indian National Developmental Inclusive Alliance (INDIA) chuan BJP tena media an beihna thar ber hi kan dem takzet a ni. Media lamah kan tang a, constitution-in freedom of speech leh expression a humhim hi kan dinpui tlat a ni,” tiin thuchhuah chuan a tarlang a.
“Tun hnai kum kua chhungin BJP te chuan an tum reng vangin media chu rah beh tumin investigative agencies te chu an hmang a ni,” tiin an tarlang bawk.