Thawhtanni zan last 32 inkhelah Brazil chuan last minute tak taka goal khungin Japan laka 2-1 hnehna nen round of 16 an lut a, an superstar dam chiang var lo Neymar Junior-a inkhel tun World Cup-ah thlir tur a la awm lo zui zel!
Asian powerhouse pakhatin goal an thun hmasak hnu second half tir lamah South American team-in an siphurh an sut a, extra time an khel ngei dawn e tih hnuah khelmual sira Neymar-a warm up pawh hmuh tur a awm hman zuau zua tawh lai takin Gabriel Martinelli chuan minute 95-ah Brazil chakna goal hlu bik a chhuihlut a, an coach Carlo Ancelotti chuan a sa huai a ser hman leh ta rih lo!
Nizan Ivory Coast leh Norway inkhela chak zawk zawk hmachhawn thei tura a team-te’n hnehna an chan hnuah Italian coach chuan Brazilian mipui bakah khawvel pawhin a inkhel lai hmuh an chak ve tho Neymar kha second half-a luhtir a rilruk thu sawi chungin, a lan danah extra time an khel mai thei dawna a lan tak avangin minute 30 hun pekbelh atan a khek leh ta zawk tih a sawi!
Hun pangngai tawp dawn thlenga 1-1 a nih lai khan Japanese-ho zawkin chakna goal khung ta se Neymar-a inkhel hmuh tur awm loin Brazil an tal fel der thei dawn tihna a nih hmel!
Ancelotti chuan a substitution strategy leh a star forward inzawm dan sawichhuakin, “Ney (Neymar) ka bia a, kan inhnehtawk chuan minute 60-a lut tura lo inring turin ka hrilh a, mahse, kan siphurh suta 1-1 a nih leh tak si avang khan extra time khelh thut palha chhawr atan ka khek leh ta zawk a ni,” a ti!
Asian giants Japan laka hlauhthawnawm zeta an chak hram hnu khan Neymar hian social media pakhat X lamah Japan-in Brazil an knock out tura chhutchhuaktu German economist Joachim Klement tih-elna thu tarchhuakin, ‘Sr. Joachim Klement … favor tentar na proxima copa, roughly translating to’ tih a dah a, chu chu ‘Mr Joachim Klement… khawngaihtakin World Cup-a kan dinhmun tur hi han ring leh chhin ta che’ tihna a niawm e!
Neymar kha extra time atan khek a ni!
