MNF party chu party dang a ni ve loa, an hruaitute an fakawmin an ropui tih MNF minister Dr R Lalthangliana chuan a sawi.
Mizo National Women Front Hqrs chuan Nilaini khan Aizawlah kumthar inhlanna an hmang a. He hun hmanpuitu MNF adviser Dr R Lalthangliana chuan MNF chu nationalism-a innghat, “Pathian leh kan ram tan” titu awmchhun a ni a, a inghahna chu Pathian chauh a ni reng tiin a sawi.
MNF dintu Pu Laldenga’n a boral san hnu ah hruaitu tha leh ropui Pu Zoramthanga a nei a, an senior vice president, deputy CM Pu Tawnluia pawh ramhnuaiah hun rei tak lo hmang tawh, a nun leh hun zawng zawng ram tana hlan a ni, tia sawiin, “MNF chu party dang ang kan ni ve lo, kan hruaitute hi an fakawm. Hun harsaah vawi tam tak kan lut a, tun sawrkarah pawh harsatna hrang hrang kan tawk a, hengte avang hian kan beidawng tur a ni lo,” a ti.
Congress sawrkar laia thleng lo kha tuna an term-ah thil tam tak an tawng tih MNF minister hian a sawi a. Sawrkar thar leh turah chuan hetiang hi a thleng tawh lo anga, chunglam pawmin ram leh mipui tan hna an thawk zel dawn tih a sawi a ni.
Sawrkar ve tum ZPM chu innghahna fumfe nei lo, an dinna biala ding nawn ngam lo niin a sawi a. Congress president Pu Lasawta pawh a dinnna ngaiah ding ngam leh lo tur nia an sawi thu sawiin, an tan sawrkar ngaihna a la awm lo tih a sawi.
“Sawrkarin beihna nasa tak kan la tawk zel ang. Chief minister, minister, MLA-te hi inthlan kumah chuan beih nasat kan tawk dawn chauh,” Dr R Lalthangliana hian a ti a. Party mipuite buai lo tura chahin, Pathian zarah an sawrkar leh ang tih ring ngam turin a chah
MNWF hian resolution pahnih an pass:-
1. Covid hrileng vanga ram pumin sum harsatna a tawk chung pawh a, buhfai leh eirawngbawlna gas bakah nitin eibar mamawhah harsatna awm loa MNF sawrkarin vawiin thlenga ruahmanna a kalpui thei hi a lawmawm kan tiin kan chhuang takzet a. Mizo mipui tawngtai chhanna chu Pu Zoramthanga kaihhruai sawrkar hi a nih avangin, kan ram hruaituten an phak ang tawka hma an lakna Pathianin mal a sawm tih phat rual a ni loa, Mizoram leh a mipui tana hma an lakna fakawm kan ti takzet a ni.
2. Sawrkarin flagship programme, SEDP a kalpui hi lawmawm kan ti a. Hemi hmanga tanpuina dawng mekte kan lawmpui a, chhungkaw tam zawkin SEDP hmang hian lei rem an rah theih ngei kan beisei a ni.
3. MNF president leh Mizoram chief minister Pu Zoramthanga kaihhruaina kan ring tawk a; Mizo hnahthlak tana pa nih tling, Mizoram leh hnam hmasawnna atana hmathlir thui tak nei leh a taka bawhzui thin hruaitu kan nei hi kan lawm a ni. Khawchhak leh khawtlang lama kan unau raltlan, nunau mangang tuamhlawmna kawnga hma a lakna hi kan chhuang takzet a ni.