Prime minister Indira Gandhi hunlaia Mizorama bomb thlak a nih avang leh Mizo mipui tawrhna avangin Mizorama awm mek Rahul Gandhi chu ngaihdam dil turin an phut tih MNF Thalai chuan an sawi.
MNF Thalai Hqrs. thuchhuak chuan, India sawrkar awpna ata zalenna famkim nei tura Zofate zalenna sual laiin hnam thinlung pu zawng zawng zaikhata luanga beih a ni a. Khatih laia min awptu leh min bawhbet tlattu kaihruaitu ber chu Prime minister Indira Gandhi niin, a kaihhruaina hnuaia Home minister GL Nanda chuan Zofate chu nuaichimih vek pawi ti loin, a sipai tamtak hnena thupek chhuahin ‘crush them’ tiin a tir chhuak tih a sawi.
‘Khawvela tu sawrkar mahin anmahni awp hnuai amite chunga an tih ngai loh jet fighter hmangin min bomb darh vek turin an rawn thawkchhuak a. Zoram hmun tam takah, nunau pawisawilote nen vaihma in, thlawhna hmangin 1966 March 5 khan min bomb nasa hle a, Pathian kutchakin min chelh a, min tihchimih tumtute chu an hlawhchham ta a. Khatih laia kan thlavang hauhtu Khasi MP-te hmaah an bomb thlak chu ration kan thlak tiin, Prime minister Indira Gandhi hian dawtin a pha mar a. Parliament House-ah bomb keh them lekchhuakin a ration thlak chu mihring tan ei chi a nih loh thu pawh an tlangaupui a ni,’ a ti.
He thil rawva tak hi Zofate thinlungah a la thi loa, khawvelah a hrechiang apiang dem a la hlawh chho zel tih MNF Thalai hian sawiin, ‘Kha thil thleng kha a tih loh tawp tur a ti ah vawiina Zofate min rawn hmangaih em em anga lan tum a tupa Rahul Gandhi hian a ngai ngei turah kan ngai a. Pawi tihna leh inchhirna neih nachang a hriat ngei pawh kan ring. Mizorama a rawn zin mek lai hian a pi leh a kaihhruai Congress sawrkarin Zofate min bomb avang khan ngaihdam a dil ngei kan phut a ni,’ a ti.
Ngaihdam dil turin Rahul phut
