French Open 2024 mipa final chu June 10, Pathianni zan khan khelh a ni a. Inkhel hmuhnawm takah Carlos Alcaraz chuan Alexander Zverev a hneh a, ropui takin a champion. Grand Slam pathuma champion thei naupang ber record a siam vanga ngaihven hlawh leh zual Alcaraz chanhin kan rawn chhawpchhuak e.
‘Tennis lal thar’ ti hial an sawi Alcaraz hi May ni 5, 2003 khan El Palmar, Murcia, Spain-a a piang a. Carlos Alcaraz González leh Virginia Garfia Escandón te fa niin a hming pum chu Carlos Alcaraz Garfia a ni a, unau pathum a nei. A pa hi Real Sociedad Club de Campo de Murcia tennis academy-a director a nih vangin Tennis a zir hma hle. Kum 2018 atang khan Juan Carlos Ferrero’s Equelite JC Ferrero Sport Academy tan a khel tan a, hma pawh a sawn chak hle. He hmun atang hian mumal leh awmze nei zawkin Tennis zin kawng a zawh chho ta a ni.
Kum 16 mi lek a nih lai kum 2020 atangin Professional huang a luh chilh tan a, inelna a hmachhawn hmasak ber chu Rio Open a ni a. Wilcard hmanga inelna a hmachhawn Rio Open-ah hian second round-ah a tla nghal. Kum 2021 kum tir khan a vawi khat nan Grand Slam a hmachhawn a, Australian Open a hmachhawn. Australian Open-an men’s single khel thei naupang ber record thar a siam. A vawi khat nan Australian Open a hmachhawn tum hian . First round-ah amah ang thoa qualifier ve tho Botic van de Zandschulp chu straight set in hneh bawk mah se, second round-ah Mikael Ymer hneh lovin a tla. 2021 Croatia Open Umag – 2021 final-ah Richard Gasquet a hneh nawlh a, a vawi khat nan ATP title a hlawhchhuak.
Inelna hrang hrangah inlan zuiin hma a sawn chak viau a, ranking lamah pawh a sang chak viau a, kum 2022 kum tawp lam a nih meuh chuan Grand Slam-ah a champion a, World No. 1 a ni ta hial nghe nghe. Kum 2022-ah hian Grand Slam dang pathumah khel chhe lem lo mah se final a lut zo lo vek a, US Open-ah ropui taka inlanin final a lut ta nawlh. Final-a a khingpui Casper Ruud lakah awlsam takin hnehna a chang a, a vawi khat nan a champion a, World No. 1 a ni zui ta hial bawk. World No. 1 a nih hian kum 19 chauha upa a ni a, World No. 1 leh Year end No. 1 ni thei naupang ber a ni nghal a, Tennis-ah Arsi eng bik pa khat a awm belh.
|ha taka kum 2022 a hman liam hnuin hliamin a tibuai a, Austrlian Open a hmachhawn thei lo. French Open hmachhawn mah se semi-final-ah Novak Djokovic a hneh lo va, final a lut zo lo. French Open semi-final-ah a tlak laiin Djokovic a champion zui bawk si vangin Alcaraz hian World No. 1 a nihna chu Djokovic-a lakah a hloh. French Open zawh hnu lawk hian Grass lamah inelna a hmachhawn zui a, Queen’s Open-ah a champion vangin World No. 1 a ni nawn leh. No. 1 ni chungin Tennis-a inelna ngaihhlut hlawh ber Wimbledon a hmachhawn a, final-ah vawi sarih zet champion tawh Djokovic hnehin a champion zui ta hial nghe nghe.
Wimbledon-ah a champion hnuin Alcaraz hian ngai a awh zui lo teh tlat a, US lamah a chetha zui lo. US Open-ah semi-final a paltlang zo lova, inelna dangah pawh champion a harsat. Kum 2024-ah pawh bul a tan tha lova, Australian Open-ah a tum ram a thleng phak lo. Australian Open-ah beisei phak lo mah se a khelh thiamna French Open-ah erawh ropui takin a champion ta a. Record duhawm tak a siam zui ta hial a ni.
Kum 21 mi Alcaraz-ah hian Nadal, Federer leh Djokovic te thatna hrang hrang a awm kim ang hiala sawi a ni. Federer angin thiamna ril a nei a, Nadal ang maiin thahrui a ngah a, Djokovic ang maiin a huaisen a, a paukhauh bawk. Kum 21 mi lek ni chunga Grand Slam title pathum a lak theih nghal mai vangin Tennis player ropui ber la ni thei tur hial a ngaih a ni nghal.
Tennis-ah ‘Big Three’ tia an sawi Novak Djokovic, Rafael Nadal leh Roger Federer te hun a liam tan a. Tennis player zinga ngainat hlawh ber Roger Federer phei chu Tennis atangin a her liam tawh. Grand Slam-a vawi 22 champion tawh Rafael Nadal chuan kum 2024-ah chawlh a tum mek a. Grand Slam-a vawi 23 champion tawh Novak Djokovic meuh pawhin chuai lam a pan a, a tha a thum ve tan ta bawk. ‘Big Three’ te hun tawp dawn lamah Carlos Alcaraz hi a rawn chawr nawlh. Nadal leh Djokovic te an chuai lam tawh a, kum naupang zawk zingah el phak khawp thiamna, thahrui leh paukhauhna nei an tam bawk si loh vangin Alcaraz hma lam hun a eng leh zual a. Hun eng emaw chen chhhung chu inelna lian a awp beh thei mai rinna lian tak a piang nghal bawk.
Alcaraz thiamna, a huaisenna leh thahrui a ngahzia pawh khawvelin a hrechiang ta viau. Inelna hrang hrangah a chetha thei viau zel bawk nen dam tha leh tlo taka a kal zel thei a nih chuan player ropui ber la ni hial thei tura ngaih a ni. Tennis tihmuhnawm zualtu a nih zui zel a beiseiawm hle.
Ngaihven hlawh Carlos Alcaraz
![](https://theaizawlpost.org/wp-content/uploads/tap_logo-min-large.jpg)