Tripura Assembly inthlanna neihah nimin chhun dar 1 thleng khan 51.35% vote a tla tawh tiin Election Commission chuan a sawi a. State Assembly member 60 awmna Northeastern State-ah hian zing lam dar 7 atanga vote thlakin tlai lam dar 4 thlengin vote thlak theih a ni.
CPI(M) leader leh Tripura Chief Minister hlui Manik Sarkar leh TIPRA chief Pradyot Bikram Manikya Deb Barman te chuan ‘BJP misual’ ten State hmun thenkhatah tharum an thawh tiin an sawi a.
“Hmun thenkhatah misual te BJP aiawha che ten buaina leh harsatna siamin mipui tena an vote thlak tur an dang a. Mahse, mipuite chuan vote thlak ngei an tum a ni” tiin Sarkar chuan a sawi a. TIPRA chief pawhin, “Dhanpur leh Mohanpur ah te ruling party ten tharum thawhna an thlen” tiin a sawi bawk.
Election Commission of India chuan South Tripura-a Kalacherra polling station-ah CPI (M) thlawptu te kutthlak an ni tiin a pawm thu a sawi a. “Kan official ten damdawi In an panpui a. Amah kutthlaktute a sawi mai thei lova, Shantirbaazar PS-ah FIR theh luh a ni a, thil tisualtute man vat an ni ang,” tiin Chief Election Officer (CEO) Tripura chuan a tweet a ni.
Election Commission chuan kumin Tripura inthlanah vote nei 28.14 lakh an awm thu a sawi a, heng zingah hian mipa 14,15,233 chu mipa niin hmeichhia 13,99,289 an awm thung a, 62 te chu third gender te an ni a. Polling station 3,337 lai a awm bawk.
Tripura inthlanah hian thuang thuma inbeihna thlengin BJP, Left Front-COngress tangrual leh party thar Tipra Motha te chuan Assembly seat 60 an incuh a. Heng seat 60 zinga 20 hi tribal council hnuia awm niin scehduled tribe tana reserve seat 19 a awm a, seat 10 chu Scheduled Castes tana reserve a ni thung.
Tripura-ah hian CPI (M) ten kum 30 chuang rorelna an lekkawh hnuah kum 2018 inthlanah khan BJP te chuan seat 60 awmah seat 36 la in thuneihna an chang a, majority mark seat 31 a ni chungin regional IPFT (Indigenous Progressive Front of Tripura) te seat 8 la te nen sorkar-na an siam a ni.
Kum 35 chuang Tripura-a rorel tawh CPI (M) te chuan kumin hian Congress te an thurualpui thung a, chief minister hlui Manik Sarkar chu hmatawnga thehchhuah ber niin Left Front te hian seat 47 an chuh a, Congress ten seat 13 an chuh thung.
Kum 2018 inthlanah khan CPI(M) ten seat 16 chauh an la a, Congress ten seat khatmah an la lo thung a, kumin hian Congress te nena thawhhona avangin CPI(M) te chuan seat 13 tal an lak belh theih an beisei thung.
Tipra Motha hi party thar Tripura royal Pradyot Kishore Debbarma kaihhruaia din niin Greater Tipraland ngiat an ni a, BJP te tichhe thei viau tura ngaih an ni bawk.
Ngaihven hlawh \huang thuma inbeihna Tripura inthlang
![](https://theaizawlpost.org/wp-content/uploads/2023/02/ng.jpg)