Ngaizela City Bus din dan
tihdanglam chu hna hmasa
Aizawl leh a chhehvela lung tlak thinna hmuna hma lak dan tur ena mithiam lokalte chuan Ngaizela lung tla thin ti reh tur chuan sum tam tak leh hun ala mamawh dawn a. Vanduaina pumpelh theihna tura hna hmasa chu a him lai china City Bus dinna thin chu thlak danglam phawt nise tih an rawt.
Mizoram sawrkarin a sawm anga rawn kal Maccaferri Geo-technical Solutions Pvt. Ltd asst. manager Er Manthan Chauhan leh chief scientist Dr C Sawmliana Council of Scientific & Industrial Research – Central Institute of Mining & Fuel Research (CSIR-CMIR) te chuan Nilaini khan chief minister Lalduhoma an kawm a. Aizawl chhehvel hmun pathuma lung tlak theihna hmun an enfiah chungchang an sawipui.
Mithiamte hian Lengpui road Pukpui bul hi, a koa chhawrdawh (benching) tura hal darh (blasting) tha in an hria a. A chunglama ram neitute pawhin mipui himna atan chuan an ram an pek phal mai an beisei tih an sawi.
Ngaizela chhiatna a thlen hian kawng chhak lam ko hnaiha lirthei awm leh tlan lai chungah a thleng deuh zel a. Kawng a zau thawkhat na in, a thlang lam sirah City Bus dah a nih avangin lirthei kaltlang turten kawng chhak lam hnaiha an tlan a ngai thin a. Hei hi tihdanglam a tul nia a lan thu an sawi.
Ngaizela lung tla thin venna rintlak tak, khuarei daih ni bawk si siam tur chuan cheng vaibelchhe 90 vel a tul dawn niin an ngai. Hlimen lama hmalak dan tur tha nia an hriat pawh an sawiho bawk.
Chief minister hian Lengpui kawng Pukpui bul ko hlauhawm siamna tur leh Ngaizel lung tla thin tihnepna leh chhiatna a thlen fo thin pumpelhna tur detail project report siam ran tha a tih thu a lo hrilh a. CSIR-CMIR nen tangdunin, a tul anga IIT mithiamte pawh rawnin, DPR siam phawt nise, tiin an rawtna a taka thawh thuai theih dan tur a lo hrilh.
Mithiamte hian chawhma lamah Home minister K Sapdanga hmuin an thil hmuh dan report an pe a. Home minister hian chief minister hnena thlen turin ruahmanna a lo siamsak a ni.
Ngaizela City Bus din dan tihdanglam chu hna hmasa
