Kum thum dawn a chawlh hnuin UFC palian champion hlui Francis Ngannou chu Mixed Martial Arts (MMA) ah a kir leh ta a. Boxing lama ring rawlh thuk hman tak Ngannou hian a khingpui Renan Ferreira chu awlsam takin a hneh.
UFC a chawlhsan hnuah Ngannou hi Professional Fight League (PFL) hmachhawn turin contract a ziak. PFL-ah inziak lut hma viau mah se boxing a khelh vangin fight a hmachhawn mai lo. Palian huanga boxer lar Tyson Fury leh Anthony Joshua a hmachhawn hnuin Octagon-ah a kir leh ta nge nge a, Pathianni zing khan Riyadh, Saudi Arabia-ah Ferreira hmachhawnin a inlan.
Ngannou leh Ferreira te hian fimkhur takin bul an tan a, round khatna tir lamah kut an inthlak fuh hleithei lo. UFC champion hlui Ngannou hian fing taka a khingpui a bum hnuin a keuhtlu a, a bawhbet zui nghal. Hun eng emaw chen a bawh beh hnuin hnet fuhna hun remchang a nei a, chiang zet zeta a hnek fuh zawn hnuin referee fight a titawp a. Ngannou hian PFL 2023 global league heavyweight champion Ferreira chu PFL-a a inlan vawi khatnaah knock-out in a hneh zui ta a ni.
Tar lan tawh angin UFC palian champion Fracis Ngannou hian thla 22 liam ta khan UFC a chhuahsan. Boxing-ah inhnek vawi hnih a hmachhawn hnuin kumin kum tir lam khan MMA chawlhsan a rilruk hman hial. Chawlh a tum rauh rauh hnuin Ferreira hmachhawn turin thutlukna a siam leh ta zawk a, Pathianni zinga an inbeihnaah awlsam takin hnehna a chang ta a ni. PFL-ah Ngannou a inlan hian boruak a siam hle a, Ferreira nen an inhmachhawn pawh kha a hmunah entu an thahnem hle nghe nghe a ni.
Pathianni zinga fight dangah UFC champion hlui Cris Cyborg chuan a khingpui Larissa Pacheco chu unanimous decision hmangin a hneh ve bawk.
Ngannou a chak awlsam
