Ngawi renga chawl Saina!
Khup na benvawn avanga 2023 Singapore Open hnu lama competitive match khel leh ta ngai lo Indian shuttler Saina Nehwal chuan Thahwlehni khan a chawl hlen tawh tih a sawi chhuak a, ngawi rengin a lo chawl fel der tawh chu lo niin!
Badminton game hmanga 2012 London Olympic bronze medallist ni thei Nehwal hi kum hnih lai a chawl tawh a, a khup hliam dam hlei thei lo avangin khelmualah a la kir thei lo mai mai nia ngaihna kha a awm a, mahse, competitive badminton a chawlhsan tih vantlang hriatah a sawichhuak ve ta nge nge a, a taksain level sang bera inlan chhunzawm turin a remti tawh lo niin a sawi.
Kum 2023 hnu lamah inelna hmachhawn leh ngai ta lo mah se official-in a chawlh thu hi a puang ngai lo a, tun kartir khan ‘podcast’ kaltlangin a chawlh thu hi a tarchhuak ta hlawl a, “Kum hnih kalta khan inkhelh ka chawlhsan a; ka ngaihdan chuan ka duhdan ang takin he sport-ah hian ka lut a, ka kalphung pangngai angin ka chawl leh mai a, ka chawlh thu han puan hluai kha tul tihna ka nei hran lo.
“Inkhel thei dinhmuna kan din tawh loh hun hun chu tawpna a ni mai a, thil dang han belh chiam tur a awm hran lo a, ka retire thu midang hriata han puan viau kha ka tih loh lam tak a ni,” a ti.
World No. 1 hlui hian a khup hliam dam tha thei lo avanga chawl a nih thu sawi chungin a dinhmun chu a nu leh pa leh a coach-te pawhin an hriatthiampui a ngaih thu leh a dinhmun dik tak pawh a hrilh chian tawh thu a tarlang tel.
Saina hian chawlh puan kher tul a tih loh chhan dang sawi zelin, a lang lo vang vang a nih chuan midangte lakah pawh a dinhmun chu a chiang mai tura a ngaih thu leh mite pawhin Saina chu a inkhel ngai tawh lo a nih hi an tih mai a duhtawk thu a sawi!
Olympic medallist hian a khup na avangin training session pawh kalpui theih loh chin a nei thu leh a thutlukna siam chu pumpelhna dang awm lo a nih thu sawiin:
“Khawvela a tha ber zinga tel tur chuan ni khatah darkar 8-9 kua lai training a ngai a, tun dinhmunah chuan ka khup hian darkar hnih khat bak a tlin lo a, han nawr leh ngaihna a awm tawh lo a, ka insangphek hram hram thei ta lo a ni,” tiin a dinhmun a sawifiah.
Rio 2016 Olympics laia a khup a tihnat avang khan Saina career hi a pangngai chho tak tak mawh ta khawp mai a; kum 2017 khan World Championships bronze medal nen khawng angreng fuin rawn comeback leh bawk mah se a khup tei vet avangin a hmasawnna tur a thuanawp leh thin.
Kum 2024 khan a khupah ruh natna chi khat (arthritis) a vei tih sawiin, top-level competition-ah kan hmu ngai dawn ta lo a ni.
Ngawi renga chawl Saina!
