NGO-ten NHIDCL office hual tum
Kolasib district-a kawngpui leh khawpui kawng siamthat hun tura an ruat an bawhpelh zin tawh avangin Kolasib-a NGO intelkhawm chuan February 16 hian Kolasib-a NHIDCL office hual an tum
Joint Action Committee on National Highway Kolasib chuan, an district leh khawpui kawngpui chu ngaihthah a nihna a rei tawh avang leh, pawl hrang hrang leh sawrkar atang pawha nawrna vawi tam a awm tawh chunga hmalakna hmuh tur a a awmloh reng avangin a siamtu tur NHIDCL hian Mizoram mipui an zah lo hle nia an ngaih thu an sawi.
Kum hnih chuang furpui an tuar tawh chung a, tun thlenga hmasawnna a beitham zia leh kawng siamtu NHIDCL leh an contractor-ten chhuanlam an la neih nitin avangin, kumin fur thlen hma in eng dinhmunah mah an thlenpui leh dawn chuang lo niin an chiang tih an sawi a ni.
NHIDCL general manager BK Srivasthava leh project manager Saksham Tyagi te chu Kolasib leh Mizoram chhuahsan tura aukhum an tum tih sawiin, ‘Heti taka Mizoram mipui min zahloa, Kolasib mipui min thamlo em em tute hian, kha leh chen hnathawhna hun an neih tawhah khan, vawiin thlenga hmasawna hmel thar min hmuh tir tur an la neihloh avangin an office hi kalh sak nise,’ JAC hian an ti bawk.
Hemi chungchangah hian Nilaini khan Kolasib sub-divisional magistrate H Lalramliana hoin JAC hruaitute, a kaihhnawih district hotute leh khawtlang hruaituten an sawiho.
SDM chuan contractor-ten an hna zo fel turin kumin July 7 thleng hun an nei a, mi thenkhatin High Court lam an thlen avangin contractor-te hian April 30-ah chuan an hna an zawh hman tur thu affidavit hmangin an thehlut nia hriat a ni tih a sawi. He thil hi High Court-in a thlir reng a, hnathawkte hmasawn dan a enzui reng tih sawiin, hetiang hi thil awmdan a nih avangin, tuna hnathawktute hna ti bahlah thei leh mipui nunphung pangngai tibuai thei boruak siam lo turin a ngen tih a sawi a ni.
NGO-ten NHIDCL office hual tum
