NH-154 kawng siam hna thawh
tikhaihlaktute bawrhsap-in kawm
National Highway 154 – Bairabi leh a chhehvel thawmthat hna kal meka compensation la dawn loh vanga lungawiloh lantir, Bairabi Land Owners Association chu Kolasib district bawhsap Robert C Lalhmangaiha chuan Thawhlehni khan a thutkhawm pui a, an nawrh titawp turin a ngen.
Bawrhsap chuan lungawiloh bultanna, kum 2006-a compensation dawng ve loten an dawn theihnan thui tak hma lak a ni tawh a, spot verification neiin, chuta an assessment report chu PWD Highway-ah thawn a ni a, chumi hnuah state sawrkar atanga thudawn bawhzuiin re-assessment neih leh niin, chu chu Land Revenue & Settlement department a thawn a ni a. State sawrkarin a pawmpuina PWD Highway-ah thawnin, PWD estimate siam chu Ministry of Road Transport & Highways regional officer Guwahati ah thawnin an thu ngaihchan mek a ni tih a sawi a ni.
Hetiang hi thil kal dan a nih avangin contractor-te hnathawk loa siam chuan awmzia a nei lo, tiin, dawhthei taka thu ngaichang a, contractor-ten hna an chhunzawm theihnan an nawrh titawp turin a ngen tih a sawi.
NH 154 (km.42 to km.58) Bairabi huamchhunga kawng thawmthatna atana ram lak hi kum 2006 khan kalpui a ni a. Hemi atana compensation dawng tur list Kolasib bawrhsap pisa-in draft a siam chu kum 2007 khan pawmpui a ni. Chutihrualin, ram neitu, he ‘award no.1 draft’ a tel ve lote hian sawrkarah lungawilohna thlenin, sawrkar pawhin a bawhzui a. Kum 2024-a assesment-ah ram neitu 34 lungawilohna chu thutlinga pawm niin, compensation an lak theihnan bawhzui a ni a. State sawrkar leh PWD Highway chuan MoRTH-in zawhna an neihte a chhang tawh.
Bawrhsap hoa thutkhawmah hian ram neitute chuan an harsatna thlenin, lungawiloh an lantir chhan pawh sawrkarin a hriatthiampui an beisei tih an sawi a. A hma thei ang bera an compensation dawn tur an lak theihnan theihtawpa hma lakpui turin bawrhsap leh PWD hotute an ngen tih an sawi a ni.
NH-154 kawng siam hna thawh tikhaihlaktute bawrhsap-in kawm
