National Highway 302 chhe zual lai thawmtha tura Khawthlangtuipui Group YMA Monitoring Committee for NH 302, Tlabung Village Council leh Zodin Village Council tangho chuan Thawhlehni khan hnatlangpui an huaihawt a, mi 700 vel an thawkchhuak.
Hnatlangpuia thawkchhuakte hi hlawm hnihah inthenin, zing dar 7 vela thawkchhuak leh chaw ei kham chawhma dar 10 vela thawkchhuak an awm a; Tlabung VC leh Zodin VC huamchhung bakah Tuichawng VC atangin an thawkchhuak a ni.
Tlabung atanga thudawn danin, mi tlawmngaite hian kawng siamna atana hman theih tur bawngtuthlawh, suahdur leh tuboh nen an thawkchhuak a, khaw chhehvel VC – Tippereghat, Khojoysury, Tablabagh, Nunsury I leh Nunsury II VC ten sum leh pai an thawh bakah PWD-in lirthei leh hnathawktu an thawh bawk. An ni bakah hian mimal leh pawl anga sum leh pai thawh thahnem tak an awm.
NH 302 hi NHIDCL enkawl lai niin, kumin July khan contractor thar BRN Infrastructures Pvt. Ltd. kutah hlan a ni. He kawng laih hna hi contractor hmasa SRK Construction & Projects Pvt. Ltd-in a thawh muan bakah hnathawh dan a dik tawk loh avangin kum 2021 atang khan kumtin fur a thlen apiangin mipuiin harsatna nasa tak an lo tawk tawh thin niin hnatlang huaihawttute chuan an sawi.
Kuminah phei chuan mipuiin harsatna liantham lehzual tawkin, nitin deuhthaw lirthei a tan bakah Tlabung leh Lunglei inkar km 95 vela hla chu khualzinten ni khata an ban hman loh chang a awm hial nia thu dawn a ni.
NH 302 thawmtha in hnatlang
