Kumin August atanga NHIDCL hnuaia kawng siamtuten kawnga phah tur lung atana an hman zing ami, Vaibek rama quarry lung chu a tha lo tih State Project Monitoring Committee chuan an hmuchhuak a. Lung hi endik turin PWD Laboratory-ah lak a ni.
Saitual – Saichal kawng Vaibek rama Lungmuana stone quarry-a lung chu lung tha lo, kawng siamna atana hman tura lak nia thu a darh avangin Mizoram State Project Monitoring Committee chuan Thawhlehni khan an enfiah a. MSPMC secretary Er Lalthanzuala Ralte chuan he quarry-a lung hi a chang lo a, a pianpui zia anga rei tak a awm theih loh avangin kawngpui siam nan a hman tlak loh tih sawiin, hetiang hi Indian Standard Code of Practice ang chuan hman phal a ni lo tih a sawi a ni.
MSPMC member, Mizoram University Civil Engineering department asst professor Er H Laldintluanga pawhin, he quarry-a lung chu ‘Shale rock’ a ni a, pan tetea a til thin avangin tuiin reilote a chiahin an pianpui zia (properties) awlsamtein a inthlak thin a. Kawng siamna atan a hman tlak loh a, fur a lo nihin chirhah a chang mai thin tih a sawi.
Mizoram PWD QCR&D Division leh Quality Control Team kaihruaitu senior EE Laltlanthangi Ralte leh a hoten quarry lung sample hi an la a, zirchian turin MPWD Central Laboratory Zuangtuiah an test dawn a ni.
Quarry neitu leh enkawltu Hmingsawithangi chuan lung hi kumin August atang khan NHIDCL-in an la tih a sawi a, lung hi hmun dangah an pe ngai lo tih a sawi bawk.
NHIDCL lung hman a chang tha lo tih MSPMC-in an hmuchhuak
