Mizorama National Health Mission hnuaia hmalakna thlirletin Ningani atang khan Aizawlah thutkhawm a ni a, vawiinah chhunzawm a ni ang.
Thutkhawm hawnna hmanpuitu Health & Family Welfare minister Lalrinpuii chuan, National Health Mission chu ministry-in a ngaipawimawh a, thawktute pawhin hlawh lak nan chauha thawk loin, mipui hriselnana thawk kan ni tih inhrereng turin a chah. Thawktu indaih lohna nasa tak awm mek sukiang turin theihtawpin an bei tih a sawi a ni.
Tele-medicine chu sawrkar policy-a tel a nih avangin a theih ang anga tichangtlung turin programme officer-te a ngen a. Health programme tam tak kalpuinaah theihtawp an chhuah thin laiin, damlo enkawl nen kaihkawp thiam a tul tih a sawi. Health department-a thawktute an chhuanawm em em rualin, mipui tana thawk an ni tih hria a, thawhhona tha nei turin a chah.
Health Minister Special Award siam chu NHM Mizoram hnuaia hmun harsa/ khirhkhan taka rinawm leh tha taka thawktu mi 9 hnenah hlan a ni.
Health principal secretary Esther Lalruatkimi chuan NHM hi centrally sponsored scheme, mission mode-a kalpui a ni tih a sawi a. National health programme hrang hranga target-te chu Sustainable Development Goals (SDGs) nen inkaihhnawih tlat a ni, tiin, programme hrang hrangah hian review leh monitoring-ah tan lak a pawimawh tih a sawi. Mizoram mipui hnena health care services an peknaah hmaih bik neih loh chu an thupui a ni tih a sawi bawk.
NHM mission director Dr Eric Zomawia chuan NHM Mizoram hnuaia RCH Programme chuan tehfung hrang hrangah North East state zinga titha ber niin pakhatna, ‘7th JRD Tata Memorial Awards’ a dawng tih a sawi a ni.
Ni hnih awh thutkhawmah hian NHM hnuaia National Health Programme 37 hnuaia hmasawnna a changtu officer-te kaihhruaina hnuaiah thlirho a ni a, hmasawn leh tha zawka kal dan tur sawiho a ni.
NHM hnuaia hmalakna thlirlet
