Site icon The Aizawl Post

Ni 100 inhlawhna sum la lak loh ho pek ngen

Rural Development minister Prof. Lalnilawma chuan ni 100 inhlawhna, MGNREGS sum la pekchhuah loh chu a rang lama pe turin Union minister a ngen.
Mizoram minister hian Union Rural Development minister Giriraj Singh chu a chenna inah hmuin hmachhawp a neihte a sawipui a. 2023 December leh 2024 January MGNREGS hlawh la lut lote pechhuak thuai tura a ngen bakah March thla thlenga wage component chhutchhuah sa pawh a hun taka pek a nih theih nan ruahmanna siamsak turin a ngen. Union RD minister hian a ranglama bawhzui nghal a tum thu a lo hrilh.
Union Minister for Jal Shakti Gajendra Singh Shekhawat pawh a chenna inah hmu in, Reiek khaw bula ruahtui khawlna atana Tan lui khuahna tur leh pilot project atana district tina ruahtui khawlna tur tuikhuah siam theihna hmun remchang zawnchhuah leh zirchianna tur sum mamawh a dil a. Union minister hian kawng zawnsak a tum thu a sawi.
Minister Prof. Lalnilawma hian official-a Taiwan-a a zin haw lamah Delhi-ah chamin, Delhi Mizoram House-a thawktute Republic Day a hmanpui a ni.

Exit mobile version