‘Ni 100 inhlawhna’ tia hriat lar, MGNREGA thlaktu tur Vikshit Bharat – Guaranteed Rozgar & Ajeevika Mission (Gramin) Act 2025 (VB– G RAM G Act 2025) chu a kengkawhtu tur Rural Development & Administration department hotute chuan an minister Prof. Lalnilawma hoin Thawhlehni khan an zirchiang.
VB–G RAM G Act hi 2025 December 21 khan sawrkar laipuiin gazette hmangin a chhuah a, state tin chu mahni state tan thla ruk chhunga scheme buatsaih tura tih an nih angin, Mizoramah pawh RD&AD hmalaknain ‘Mizoram VB– G RAM G Scheme 2026’ ruangam duangin peihfel a ni tawh a. Budget Session hmasa berah he scheme hi Legislative Assembly-a pharh hman a ni dawn tih RD&AD minister hian a sawi.
RD&A additional secretary V Lalengmawia chuan powerpoint presentation hmangin VB–G RAM G dan thar a sawifiah a. VB–G RAM G hnuaiah hian sawrkar kum khat chhungin thingtlang mipui hnenah ni 125 tal inhlawhna pek a ni dawn a, MGNREGA-a mipui inhlawhna (wage component), sawrkar laipuiin 100% funding a pek thin ang chu 90:10 sharing pattern a ni tawh ang. Sawrkar kum khat chhunga mipui inhlawhna labour budget hmanga pek thin pawh normative allocation hmangin state tinah sum pek a ni tawh dawn.
Thingtlang loneituten buh an tuh leh seng buai laia anmahni hnaa an inpumpek theihnan kum khatah ni 60 chhung tal VB–G RAM G hnuaia hnathawh tur chawlh a ni anga, VB–G RAM G hnuaia hnathawh tur reng reng chu Vikshit Gram Panchayat Plan-a thun vek a, Block leh District-a pawm a nih hnuah state sawrkarin pawm ve lehin, Viksit Bharat National Rural Infrastructure Stack-a thun luh chauh thawh theih a ni dawn a ni.
Ni 100 inhlawhna thlaknaah ni 125 an inhlawh tawh dawn
