Ni 100 inhlawhna tur budget-a
dah anga insawi hi dawt – MPCC
MNF-in Lungleia ni 100 inhlawhna kalpui zelna atan budget-ah dahfel a ni tawh tia an sawi chu dawt a ni tih Congress party chuan an sawi.
MPCC thuchhuak chuan MNF Thalai-in Lungleiah Municipal awm dawn mah se, Lunglei mipuiin ni 100 inhlawhna an kalpui zel theih nan state sawrkarin budget-ah a dahfel tawh, tia an sawi chu thu belhchian dawl lo a nih zia kum 2023- 2024 budget document atanga awlsam taka finfiah mai theih a ni tih a sawi.
‘Sawrkar kum thar tur, 2023- 2024 ah hian ni 100 inhlawhna (MGNREGS) atan sawrkar laipui (CSS) atangin cheng nuai 11000 hmuh beisei a ni a, hei hi sawrkar kum kal mek 2022- 2023 chhunga hmuh tur zat chhut cheng nuai 22462 aiin nuai 11462 in a tlem zawk. Sawrkar kum kal mek leh sawrkar kum thar tura ni 100 inhlawhna atana CSS hmuh beisei zat hi a inthlauh em avangin LMC ding mai tur Lunglei mipui tan hian budget-ah engmah an dah lo zawk tih a chiang a. Ni 100 inhlawhna atana state sawrkarin CSS a lo doletna tur state matching share pawh budget thar (2023- 2024) ah cheng khatmah dah a ni lo,’ a ti.
MNF Thalai-in dawt a nihna finfiah leh mai theih hmanga Lunglei mipui bum an tum chu MNF hotute rintlak loh zia an lantirnaah Congress party chuan a ngai tih a sawi a ni.
Ni 100 inhlawhna tur budget-a dah anga insawi hi dawt – MPCC
![](https://theaizawlpost.org/wp-content/uploads/tap_logo-min-large.jpg)