Ni 180 chuang vawk thi tawh

Mizoramah African Swine Fever (ASF) a leng a, vawk a thi hnem ta hle. Ni tinin vawk a thi a, ni 180 chuang chu ni tinin ASF vanga vawk thi a awm ta.
AH&Vety department te chhinchhiahna enin, kuminah a zawnin ni 186 chhung a zawnin ASF vangin vawk a thi tawh; May ni 6 atang khan, November ni 7 thlengin ni tin vawk a la thi.
ASF hri hi a tihdam theih loh avangin a vei an tihlum/suat thin a, hei hi hri a darh loh nana tih a ni. Vawk tihhlum/suat (cull) pawh ni tin a awm a ni ber, October ni 27 khan tihhlum a awm lo a, hei hi May ni 5 hnua vawk tihhlum a awm loh ni awm chhun a ni. May ni 6 atanga November ni 7 inkarah, October ni 27-ah chauh lo chuan vawk tihhlum a awm ziah.
Kuminah January thlaah ASF vanga vawk thi a awm lo a, kuminah February ni 9-ah he hri hi finfiah a ni. April leh May vel atangin a hluar a, kum laihawlah a nasa ta zel bawk.
October thla vel atang khan a nasa zawngin a kal ta lo a, thla chawhnu lamah phei chuan a zia ta viau. Mahse hri vei leh hri vanga thi chu a la awm.
AH&Vety department chhinchhiah danin, kumin hian November ni 7 thleng khan ASF vangin vawk 14483 a thi tawh a, vawk 23865 tihhlum a ni tawh.
AH&Vety department hotute chuan hri hi a nasa tawh lo tih an sawi a, ni khat chhunga vawk thi zat te, tihhlum zat te a tlem telh telh bakah hri finfiah tharna pawh a awm tawh loh bakah hri lenna hmasaah a reh tawh tih te an sawi. October ni 27-ah vawk tihhlum/suat a awm lo pawh kha thil chhinchhiah tlak a nih thu an sawi.