US Marine veteran Justin O’Donnell chuan World of Warcraft khelin, khawvela videogame khel rei ber record a siam.
Justin hian zan mut theih loh hri (insomnia) a nei a, PTSD bakah rheumatoid arthritis a nei bawk. A zan mut theih loh hi hmang tangkai a ni ngei a, darkar 78 leh minute 30 chhung videogame a khel ngat ngat a, a hmaa videogame khel rei record chu kar 19 chuangin a khum ta a ni.
Justin hi Twitch-a stream thin a ni a, chawhrualin thla khata dar 250 vel stream thin ang a ni a, heta tanga a sum hmuh zawng zawng chu charity-ah a pe vek thin a, a mamaw leina tur erawh part-time hna thawkin a inhlawh thin. 2020 atang khan dollar 1,00,000 chuang a donate tawh a, a viewer ten dollar 45,000 charity hrang hrang atan an thawhkhawm tawh bawk.
Tun tum a record siam hi New Jersey-a ui chuangtlai enkawlna Husky House tana sumtuakna tura a tih niin, dollar 3,000 chuang a tuak ngah thei nghe nghe a ni.
Justin hi US Marine-ah tangin, 2010 thleng sipaiah hian a tang a, a sipai tan hian a insomnia a tizuala a hriat thu a sawi a, darkar 200 dawn te mutchhuak miah lova awm chang te pawh a nei a, kar khatah darkar 15 vel awrh te a mu thin a, tunah hian inenkawlna thar dawngin, zan khatah darkar 2-4 te mut chang a nei ve ta zawk a ni.
Guinness guidelines-ah chuan Justin hian darkar khat minute 5 zel chawlh a nei thei a, a chawlh neih hi a khawl thei bawk. He a chawlh neih chhung chauh hi ei leh in, intihfai leh thil tul dang tih nan a hmang thei. Record siam tura game a khelh chhung hian a mu miah lo va, mahse, a chawlh neih hi han zik mar vel nan te hmangin, a ui nena infiamna hun te a neih theih phah a, record a siam hian a chawlh neih minute 80 a la hmang bang nghe nghe a ni.
Ni 3 chhung World of Warcraft khelin record siam
