Ni 44 hnuah lungalhthei khura tang ruang pahnih hmu leh
Dima Hasao district, Assam-a lungalhthei laih chhuahna khur chhung atangin ni 44 zet liam hnuah, Nilaini khan tui chhung lut thiamte chuan ruang tawih chhe tawh tak pahnih an la chhuak leh.
January 6-a khura chhiatna thlengah hian thil lai chhuaktu pakua tangin an zinga paruk chu an ruang hmuh a ni ta tihna a ni.
Umrangshu-a khur chhunga tui tam tak lut hi thla khat chuang paih chhuah tuma beih chhunzawm zel a la ni a. Ruang tawih tawh tak pahnih hi tui lut thiamten hmuin an la chhuak thei tawh a ni.
Ruang hi tute nge an nih tih an la hre thei rih lo thung niin thuneitu sangin a sawi.
Chhiatna a thlen hnu ni hnihah thawktu pakhat ruang chu hmuh a ni a, January 11-a ruang dang pathum hmun leh a ni bawk.
Lungalhthei laihna khura chhiatna tawk, an ruang hmuh tawh mi pali chhungte hnenah hian sorkar chuan zangnadawmna Rs nuai 10 theuh a lo pe tawh a, mi dang panga, an ruang la hmuh lohte hnenah Rs nuai 6 theuh pek an lo ni tawh bawk.
State sorkar chuan ruang la hmuh lohte pawh hi hmuh an nih hunah an chhungte hnenah Rs nuai 10 theuh pek kim vek tur an nih thu a sawi.
Chief Minister Himanta Biswa Sarma chuan tui paih chhuah hna thawk mek hi tuna an thawh chak anga an thawh zel theih chuan ni 25 atanga 60 chhunga zawh fel hman a beiseiawm tih a sawi a, ‘hmuh kim an nih hma’ chu an bei zel dawn tih a sawi bawk.
Chief minister hian a hmain chhiatna thlenna khur hi kum 12 zet hluihlawn tawh a nih thu leh kum thum liam ta thleng khan Assam Mineral Development Corporation hnuaiah a la awm thu a sawi.
State sorkar hian chhiatna thlen dan chhuina thupek a chhuah a, high court judge chawl tawh, Anima Hazarika chuan a chhui a ni.
Ni 44 hnuah lungalhthei khura tang ruang pahnih hmu leh
