Ni 5 school khar hnu-ah flag dum zarin nawr tel
Lumpsum aided atanga adhoc aided-a hlankai ngiatnaah higher secondary school 9 chuan ni 5 chhung school an khar tawh a, an thil ngen tihhlawhtlin sak an la ni lo. Heng school awmna khaw tam zawkah chuan NGO leh political party te nen nawr zui niin, September 4 khan khaw pahnih chuan, school khar bakah khaw pumin flag dum zarin an thil phut an nawr chhunzawm.
Thingsulthliah Joint Action Committee for School Upgradation leh Thingsulthliah Higher Secondary School Student Union hmalaknain Thawhtanni khan Thingsulthliah, Thingsul-Tlangnuam leh Selingah adhoc grant-in-aid phutin flag dum tar a ni.
Hemi hmaa inkhawm neihah Thingsulthliah HSS principal & Managing Board secretary R Lalfakawma chuan, Thingsulthliah Sub Town (Thingsulthliah, Tlangnuam, Seling) ten higher secondary school changtlung zawk, sawrkarin a enkawl an la nei lo chu a zahthlak tih sawiin, school enkawlna tura ni 100 inhlawh atanga mipui chanai sawh hek ngai ziah mai te; VC-ten development work an khawih apianga school enkawl a tul vanga duhthala hnathawhna an nei lo reng maite chu a luhai thlak zozai ta tih a sawi.
Tuna MNF sawrkar hian mipui phurrit hi kum 2018 inthlan dawn khan hmuh thiam puiin, an tlin phawt chuan adhoc grant-in-aid ah hlan an rawn tiam a. A hlawhtlinna erawh an la hmu loa, Education minister-in school upgradation kalpui tura ruahmanna a siamah pawh an tel lo leh ta zel tih a sawi.
Adhoc grant-in-aid ngiat hian Thingsulthliah khuaa all NGO & all political party thukhawm chuan resolution an lo siam tawh a; zirlai nu leh pa kalkhawmte pawhin admission fee & monthly fee an awl theih nan adhoc ngiatna thuchhuah an lo siam tawh a ni. Thawhtanni vek khan JAC hruaitute hi Aizawlah minister remchang apiang dawr turin an kal nghal a ni.
NE Khawdungseiah pawh an HSS chu adhoc status-a hlankai ngiatin Thawhtanni vek khan in tinah flag dum zar a ni.
Mizoram Govt. Lumpsum Aided Higher Secondary School Association hnuaia kum 2008-a lumpsum aided-a dah school 9 – Thingsulthliah HSS, Farkawn HSS, Zobawk HSS, Zawlnuam HSS, West Phaileng HSS, E. Lungdar HSS, NE Khawdungsei HSS, Phullen HSS leh Tuisualral HSS hian an thil phut nawrna atan August 28 khan sikul kal tho si a lehkha zir loin sawrkar an lo ngaichang tawh a, August 29 atang khan tiamchin awm loa sikul khar chunga sawrkar thu ngaihchan an tum tih sawi a ni.
Ni 5 school khar hnu-ah flag dum zarin nawr tel
