Ni 71 chhung Covid-19 vei thar awm lo tawh

Kuminah Covid-19 a rawn inlan leh a, mahse a zia ta; tun hnai ni 71 chhungin hri vei hriatchhuah thar an awm lo.
Integrated Disease Surveillance Programme (IDSP) chhinchhiah danin, September ni 16-ah hri vei hriatchhuah pakhat a awm a, chumi hnuah hriatchhuah an awm tawh lo. Ani hi September ni 22-ah a chhuak a, chumi hnu chuan Mizoramah hri vei an awm ta lo.
Kuminah May thla atangin Covid-19 vei an awm leh a, July leh August-ah a pung. Vanneihthlak takin September atangin a zia a, October-ah hri vei hriatchhuah an awm lo. November thlaah pawh hriatchhuah thar an awm rih lo.
Kuminah kum laihawlah India ram hmun thenkhatah Covid-19 hi a darh leh a, kum chawhma lam atangin a intan. India sorkar pawhin hri do hna a bei ngawrh thar leh a, India sorkar thu angin Mizoramah pawh ngawrh zawka do a ni.
Mithiamte chuan Covid-19 hian khawvel a chenchilh tawh a, Mizoramah pawh hri vei thar hi an awm thin turah an ngai.
Mizoramah hian nikum October-ah hri vei hriat thar an awm hnuah thla ruk chuang hri vei hriat thar an awm lo a, kuminah May ni 30-ah an awm leh. Mahse vanneihthlak takin a nasa zui lo; IDSP chhinchhiah danin, nikum khan hri vei hi mi 73 an awm a, kuminah mi 40-in an vei tawh.
Kuminah Covid-19 vei leh vei loh endikna hi ZMC-ah dah a ni a, endik hi chu an awm ve deuh reng. Nilaini pawh khan pakhat endik a ni a, Thawhlehni-ah paruk endik niin, Inrinni khan pali endik an ni. Sample endik ngai hi chu a awm ve deuh reng a, vanneihthlak takin an lo him thin a ni.
November ni 26 thlenga Mizorama sample endik tawh zat hi 19,98,225 a ni a, hri vei tawh zat hi 2,39,675 a ni.