Ngaizel rama humhalh huamchhunga khawsa, Mizoram state animal – Saza (Serow) chu tunhnaiah ni 9 chhungin pahnih an thi a, mi kut tuar niloin damlohna engemaw tak an nei nia rin a ni.
July 6 zing khan saza puitling tawh pakhat chu Ngaizel kham huamchhung, World Bank Road-a petrol pump bulah chau taka hmuh a ni a, bawihsawm a nih laiin a thi zui a ni. A taksaah silaia kahna emaw thanga awhna hliam emaw hnuhma a awm lo. A lan danin kum 10 chuanga upa nia ngaih a ni.
July 12 tlai khan Ngaizel khamah bawk hian saza la chu kham atangin a rawn tla a, pawnlamah kut tuar a nihna awm hmuh tur a awm loa, a tlakna lamah hian a inhliam na hle nia ngaih a ni thung. Vety Polyclinic lamah uluk taka enkawl a nih mek laiin July 14 zing khan a hliam tuar loin a thi. Kum 3/4 chho vel ni tura ngaih a ni.
The Aizawl Post-in a zawhchiannaah Aizawl Wildlife Division-a deputy conservator of forest Margaret Lalramchhani, IFS chuan saza thih chhan hi chiang taka hriat tumin College of Veterinary Sciences & Animal Husbandry Selesih-ah a ruang thawnin laboratory-ah uluk zawka enfiah a ni tih a sawi a. July 12 tlaia hmuh zawk hi a taksa pawn lamah bawl sen a tam a, a tlaknaah a taksa chhunglam a sawh chhiat chu a thih chhan nia ngaih ni mah se, khampanga chetla thang saza a rawn tlak ngawt chhan kha damlohna /hri vanga taksa chak lo a ni em tih zirchian a ni anga, hma lak zui dan tur chu AH & Vety department nen an ruahman thei ang tih a sawi.
Saza hi ran zakzum angreng tak an nih avangin, mihringin tam tham deuh hmaa an awm hian anmahni ah nghawng a nei nasa ve thei a, ‘stress’ nasa tak a siam avangin an nunna atana pawi thei hial a nih avangin an mit khuhsak hram a tha tih a sawi a ni.
Leilung kan chilphul nasat danah ramsaten an lo chhar ve theih leh an ngeih loh tur ei leh in leh a kawr kan thehthang tam lutuk te, luite tui bawlhhlawh ta lutukte pawh an tan harsatna thlentu a ni thei tih a sawi bawk
Ni 9 chhungin saza pahnih thi
