September 11 leh 12 khan Mizoram hmun hrang hrangah chetsualna leh khuarel chhiatna kaihhnawiha nunna chan mi paruk an awm.
September 12 tlai dar 4.00 vel khan Thingdawl Venglaiah truck-in Danial Vanlalmalsawmpuia (6) s/o Ricky Vanlalpeka chu a chil a, ka pawh chhawn lohin a thi. Thudawn danin, Daniel Vanlalmalsawmpuia hi a thiante nen September 13 – Pathiannia Naupang Sunday School Inkhawmpui neih tur inbuatsaihin chang zirin biak inah an kal a, hemi hnu hian inkawm zuiin kawngpui sira an awm chu balu phur truck hian a chil ta a ni, truck khalhtu hi khawtlang hruaituten police kutah an hlan nghal a ni.
Hetihlai hian, Thingdawl khuaah hian F. Lianthuama (60) Thingdawl Hmar Veng chu, Thingdawl ram Dawngluiah thi a chhar a ni a, khamah a tla nia hriat a ni. Thudawn danin Lianthuama hi a makpa nen chakai meichher chhit tumin September 11 khan an chhuak a, zana innghahna tur an tihah a makpa hian a nghah chhuah zawh loh avangin a hawsan a, in lamah thil awmdan a sawi hnu in zawng turin zingkarah an chhuak lehnghal a, lengkir hnuaiah thia hmuh a ni.
September 12 chhun dar 12.00 vel khan Zoramchhana (39), Khawlailung chu Hmunzawl Kai, Tuichang luiah a tlahlum. Thudawn danin Zoramchhana hian pik up a nei a, Hmunzawla biak in sakna tur cement chu Khawlailung leh Hmunzawn inkarah lirtheia inhlanchhawng tura kal an ni. Tuichang lui hi a lian a, lirthei kaina thin a chim dan vel endik tuma va kal a ni. Tui thiam tak nia sawi a ni a, tui hi a khauh avangin a chesual palh nia rin a ni. He chanchin buatsaih lai hian a ruang hi la zawn mek a ni.
September 11 zana ruahsir nasaah Vairengte Zalen Vengah in a chim a, a chim hnan zing ami Zodinliana (13) s/o Lalramneiha chu a thi. Thudawn danin, in hi Assam type chhawng khat a ni a, chhungkaw hnih – Ngamlalliana in leh a bula a fapa Lalhlimthanga in chu an chhak lam leiminin a hnawl tel a ni. Leimin tur thawmah hian thenkhat chu an lo insaseng hman a, insaseng hman ve lo zing ami Zodinliana hian a nunna a chan a, midang pathumin hliam an tuar a, an zingah hian Zodinliana pa Lalramneiha leh a pu Ngamliana hi an tel a, damdawi inah enkawl an ni.
September 11 tlai dar 5.00 vel khan ruahsur avanga tuihawk luankawra tui luangin Lawngtlai College Veng ami Ruby Lalrinsiami (6) d/o B Lalbawlliana cchu metre 300 vel a len a, chhan hman lohin a thi. Thudawn danin, Ruby Lalrinsiami hi a thiannu nen an thenawmia dawrah thil lei turin an kal a, kawngsira tuiluankawra chak taka tui luangah Ruby-i’n a ke a zuk chiah chu tuihawk hian a la ta a, a thiannu hian umzui mah se, tui hi a chak avangin a umpha loa, in lama Ruby pa hrilhin, a ni hian a thianpa nen an umzui nghal a, tuiluankawr a mumal tawh lohna leh hnimin a bawh nasat avanga kal rem lo lai an hel hnu ah a ruang hi lengkir hnuai tuitlingah an hmu. Ruby hi KG-II zirlai a ni.
September 11 chawhnu dar 2.30 vel khan PC Vanlalhmuaka (17) s/o PC Lalrinchhana (L) Saitual Dawr Veng chu Khawzawl district Dulte khaw daia Dilmawiah a tla a, hemi zan dar 8.45 velah a ruang hi hmuha lakchhuah a ni. Thudawn danin PC Vanlalhmuaka hi Govt. Higher Secondary School Saituala pawl 11 (Science) zirlai a ni a, kumin Serchhip-a Evangelical Union inkhawmpui neih tur atan Dilmawiah hian reels siam turin an kal a, helaia lei indawh ve deuhna lai chu rap pialin a chesual ta nia sawi a ni.
Ni hnih chhungin sar thi paruk
