Prime Minister Narendra Modi chuan ni nga awh parliament special session neihna bultannaah parliamentary zinkawng sawihona hun a hawng a.
Tun session hi parliament building hluiah neih niin mahse September 19 atangin building tharah insawn a ni dawn thung a ni.
Parliamentary Affairs Minister Pralhad Joshi chuan political party tin floor leader te chu special session neih hma niin all-party meeting neihah a hrilhfiah tawh a ni.
Session-a ni thum chhung chu sorkar business ngaihtuah nana dah a ni a, mahse eng nge ngaihtuah tur tih chu tihchian a la ni lo. Sorkar chuan bill pariat ngaihtuah a ni ang a ti a, chung zinga pali chu sepcial session ah chhawpchhuah tur a ti a. Session agenda a sawi duh loh avangin sawiselna a tawk nasa hle bawk a. Opposition leader te chuan Centre in Parliament a confidence a neih lohna pholanna an tihsak a ni.
Prime Minister Modi chuan thu a sawinaah New Delhi-a hlawhtling taka G-20 summit thlen chu Indian 140 crore te hlawhtlinna tiin a sawi a, mimal emaw party emaw tuma ta a ni bik lo a ti.
Lok Sabha-a “Parliamentary Journey of 75 years starting from Samvidhan Sabha — Achievements, Experiences, Memories and Learnings” tih sawihona bultanah Modi chuan India ram federal structure, diversity leh sorkar hrang hrang te chuan G-20 palaite chu an lo lawm a ni a ti bawk.
G-20 hlawhtling taka thlen chu 140 crore Indian te hlawhtlinna tia sawiin India hlawhtlinna niin mimal emaw party emaw in hamthat nana lak chi leh theih tur a ni lo a ti bawk.
PM Modi chuan parliament building hlui chu a ui thu sawiin history tam tak thlenna a ni tia sawiin thangthar te la ngaihven zel tur a ni a ti a. “Building thara kan chuankai hmain he Parliament building hlui atang hian thil tam tak hriatreng tlak kan hriatreng a ngai a ni” tiin PM Modi chuan a sawi bawk.
Parliament building hlui chungchang sawiin Modi chuan foreign ruler ten a structure siam an tum laiin a thawk tak taktu chu India mite thawhrimna leh thlan tui leh sum zawk a ni a ti bawk a. Prime Minister chuan Parliament a luh hmasak ber sawiin member nia a luh hmasak berah mipui te ngainatna nasa tak a hlawh dawn tih a inhre lawk bik lo tiin a sawi bawk a ni.
Independence hmain he building hi Imperial Legislative Council tih a ni a. Independence hnuah chuan parliament building tih a ni ta a ni a ti bawk a. Kum 75 chhungin democratic tradition tam tak siam a ni a. He House a tel tawh mitin ten thawh an nei vek a ni, tiin Modi chuan a sawi bawk.
“Thil thleng duhawm leh duhawm lo te pawh a awm a, a changa inhnialna leh inbakkaihna te leh hlimna leh lawmna te pawh a awm a. Chungte chu kan hriatreng tlan vek a ni a, kan heritage intawm niin kan chhuan tlan pawh a ni” tiin Lok Sabha-ah a sawi bawk.
“Nehru atanga Shari atanga Vajpayee thlengin, Parliament chuan hruaitu tam tak tena India hmathlir an neihte a tawng a ni” tiin a sawi bawk.
“Building tharah kan awm dawn tawh chungin building hlui hian mi tam takte ngainat a la hlawh dawn a ni” tiin Prime Minister chuan a sawi bawk.
Ni nga awh Parliament session nei tan
