Tun hnaiah ruah a sur tluk tluk a, ni sarih chhung a
zawnin ni tin ruah a sur. Ruah tui a tam hmel a, mahse kum dang nena khaikhinin kuminah ruah tui a la tam lo.
State Meteorological Centre-in an chhinchhiah danin, July thla thleng khan kuminah Mizoramah ruah tui mm 951.6 a tla tawh a, kum hmasa a pha lo hle. 2021-ah khan July thlengin ruah tui hi mm 1010.6 a tla a, 2022-ah July thlengin mm 1310.9 a tla.
July thla hi Mizoramah ruah tui tam thla a ni a, nikumah pawh ruah tui tam ber thla a ni. Tun hnai kum thum chhunga July thlaa ruah tui tam lam enin, kumin hi a tlem ber thla a ni.
State Meteorological Centre-in an chhinchhiah danin, kumin July thlaah khan ruah tui mm 291 a tla a, 2022 July-ah chuan mm 460.2 lai a tla. 2021 July-ah pawh mm 360.3 a tla. 2019 July-ah phei chuan ruah tui hi mm 539 lai a ni. 2020 July-ah khan kumin July aiin a tlem a, mm 243.1 chauh a ni.
August pawh ruah tui tam thla a ni a, kuminah ruah tui hi a tla hnem rih; August ni 1-ah khan ruah a sur lo a, ni 2 atanga ni 8 thlengin ruah a sur. Kumin August thlaa ruah tui tla tawh hi mm 151 a tling tawh.
State Meteorological Centre enkawltute chuan khawchin thlirlawknaah ruah a la sur rih dawn tih a nih thu an sawi a, August ni 14 thlengin Mizoram hmun hrang hrangah ruah a sur dawn tia thlirlawk a nih thu an sawi.
Ni sarih khua cheng tawh Kuminah ruah tui la tam lo
