India rama hnuchhuitu pawl, National Investigation Agency chuan India hmelma, India-in a man duhte list, ‘Most Wanted list’ a tihchhuah hming langsar zingah Lashkar-e-Taiba hotupa, Hafiz Saeed te; Hizb-ul-Mujahideen hotupa, Syed Salahuddin leh 26/11 beihnaah bultumtu ber, Zaki-ur-Rehman Lakhvi te chu an tel a. Luman nei sang ber erawh Telengana-a Maoist hel pawl hotupa a ni thung.
NIA-in list a tihchhuah thar hi mipuite hriat theih turin an dah chhuak a, ‘most wanted fugitives’ an ti a. NIA chuan an chinchang hria emaw, man theih dan tur hria emaw chuan email hmangin, assistance.nia@gov.in emaw, 011-24368800-ah emaw biak theih an nih thu an tar lang.
List thara hming lang 258 zinga 15 vel chu hmeichhia an ni a. A tam zawk hi Interpol pawhin man an duh an ni hlawm a. NIA chuan India rama ‘firfiaka che thin’ tih te, ‘helho train-pui thin’ leh ‘puak thei thil kam thin’ tiin a sawi hlawm.
List-a lang zingah hian Maoist an lang nual a, anni hi ‘India sorkar phiara indona thlentu’ tih leh ‘ralthuam leh pawisa tam tak kawl’ tia chhinchhiah an ni. Hming lang zinga 98 hi Red Corner Notice an tih, hmuhna hmun apianga man theih nghal an ni hlawm.
Mi 57 chu luman nei an ni a, an zingah hian Mupalla Lakshman Rao, Ganapathy tia an koh thin bawk chuan luman Rs Nuai 15 zet neiin a sang ber a ni a. Ganapathy hi Maoist-a an hotu lawk zinga mi niin Gaya, Bihar velah kum 2017 kha chuan a awm tih hriat a ni a, tunah erawh a awmna tak hi hriat a ni tawh lo thung. Ganapathy hnuaia mi, amah thlak thei hnai ber, Nambala Keshav Rao, Basavraj tia an koh pawh list-ah hian langin luman Rs Nuai 10 a nei a. Basavraj hi IED lam hre tak, sipai anga chet tlat pawh thiam tak niin an sawi.
Hming lang zinga 15 chu Pakistan-a awm mek an ni a. Red corner notice an pek zingah hian Zaki-ur-Rehman Lakhvi, Abdur Rehman Hashim Syed, Hafiz Saeed leh Sajid Majid te pawh an tel a. 26/11 Mumbai beihnaa tel, David Headley pawh list-ah hian a lang a. Anni bakah hian Pakistan atang hian Hizbul firfiak pawla mi, Junaid Akram Malik chuan Rs Nuai 10 luman a nei bawk.
India hian kum 2011 khan ‘most wanted fugitive’ tiin hming 50 chuanna chu a vawi khat nan a lo tichhuak tawh bawk a ni.
NIA-in an mi man duh ‘Most Wanted list’ tichhuak
