Hremna chu sus-pend a ni a, hrem tawk chu Youcef Atal niin, Ligue 1 club-in he Algeria defender an hrem chhan hi social media lama Juda-te duhlohna post a siam vang a ni.
Kum 2018 khan Atal hian Algerian club Pa-radou AC chhuahsanin Nice a zawm a; an player pawisawi lo tak ni mah se tunlaia Israel leh Gaza inbeihna kal mekah hian an Arab-puite tawrhna a enliam mai mai theih loh avangin kum 27 mi hian Hamas lam a thlawpna leh Israel a huatzia a thup zo lo a, a hnuah a Instagram post hi paihin thupha chawi mah se la ‘suspend’ a pumpelh zo ta chuang lo a ni.
Nice khuaa public prosecutor office chuan Atal hi firfiaka chetna a thlawp em tih an chhui-chiang mek a ni.
A khelhna club Nice pawhin thu leh awm hma atan an defender hi an club thiltiha inrawlh thei lo turin an hnawt-chhuak lailawk rih phawt a, thuchhuah an siamah an player chuan a tihsual pawmin a thu post pawh mipui lak atangin a nawtreh leh nghal thuai a, ziak ngeiin vantlang hriatah thupha a chawi nghal bawk niin an sawi a, chuti pawh ni se mipuia tarchhuah a nih dan leh a thuken serious dan enin club lam chuan an player chunga thununna an lekkawh nghal rum rum a ngaih thu leh sport leh dan mit atanga action lak leh theih a nih thu an tarlang tel.
Atal-a thu post hi sakhaw pakhat beh-chhana mipui thinrimn leh tharum thawh tura mipui chawhthawhna a ni em tih chungchangah prosecutor office chuan chhuichianna an kalpui mek a, French Football Federation (FFF) ethics council pawhin Atal-a thu post hi an zirchiang ve mek bawk.
Pathianni daih tawh khan FFF president Philippe Diallo chuan engti kawng mahin inhuatna thusawi leh ziak chuan hmun a chang lo tih a sawi.
Algeria ram tana game 31 khel tling tawh Atal hian tun season Ligue 1 kal mekah Nice tan game ruk a khel tling tawh.
Netherlands winger Anwar El Ghazi pawhin social media lamah bawk post siama Israel-Gaza buaina chung-chang a tarchhuah avangin a khelhna club Mainz chuan an club behchhana training leh game khelh an lo khap ve mek bawk.
Nice-in Algeria defender an hrem
