Niger military junta te chuan Russian mercenary group Wagner te puihna an ngen tia sawi niin hei hi West African regional bloc ten sipai chakna hmang an beih mai an hlauh vang tia sawi a ni.
Coup leader Gen. Salifou Mody chuan thenawm Mali ram tlawhin chutah chuan Wagner te nen inhmuhna an nei niin Wassin, Nasr, journalist leh senior research fellow, Soufan Center chuan a sawi a ni.
“Wagner te hi thuneihna an chan theih nan an mamawh,” tia sawi a ni a. Western military official te pawhin Niger coup leader te hian Wagner te be pawp ngei nia an hriat thu an sawi bawk.
Pathianni kha Niger junta te West African bloc ECOWAS tena democratic hmanga thlantlin President Mohamed Bazoum an hren mek hnena thuneihna pe let tura an thutiam tawp ni a ni a.
ECOWAS defence chiefs te chuan kar kalta Zirtawpni khan inhmuhkhawmna nei tawhin Ninani a Niger-a palai an tirh leh Ge. Abdourahmane Tchiani hmu tura an tih chu an lo hnar tia sawi a ni bawk a.
Gen Tchiani chuan Mali tlawh zuiin hemi hnu hian Mody chuan ECOWAS te chu sipai chakna hmang lo tura vau zuiin niger chuan ‘Libya thar’ an nih loh chuan theihtawp an chhuah dawn tiin a sawi zui nghal a ni.
Niger hi Khawthlang ram tena counterterrorism lama helai region-a an behchhan ber ram a ni a, tun hnai lawkah sipaite chuan sorkar an paihthla a, Junta te chuan Russia awn an tum tia sawi a ni. Russian chhuak Wagner te hi African ram hrang hranga inbengbel sa niin chungah te chuan human rights nasa taka bawhchhiaa puhin a awm bawk.
Niger military leader te hian an thenawm Mali leh Burkina Faso a sipai sorkar chetlak dan chu an entawn tia sawi niin mahse thuneihna sawhngheh nan an che chak hle tih a ni bawk a. “Tchiani hian rang taka chetlak thuai thuai a duh a, a chhan chu khawvel ram dangte chetlak hmaa engkim tihfel a duh a ni,” tiin Wasim Nasr chuan a sawi bawk.
ECOWAS te thu zawm lo ta se engtiangin nge thil a thlen dawn hriat theih a ni lo va. Hetih lai hian Niger junta te chuan a mipuite chu spy ni thei awm te thlir reng tura tiin self-organized defence group te cuan capital Niamey pawh zankhua khua in an patrol reng tawh bawk a.
ECOWAS chuan Niger hi an hrek der tawha hei vang hian harsatna nasa tak a tawk nghal der tawh a, Niger luh leh chhuahna lei leh vansang te chu kharsak an nih avangin Niger ram chhungah thil man a sang hle tawh tia sawi a ni bawk.
Niger coup leader ten Wagner bia ti
