Niger khawpuiah a chhan hriat loh silai ri leh thil puak ri nasa
Niger khawpui, Niamey daia international airport-ah silai nasa taka puak leh thil puak ring tak hriat a ni a, eng tak nge thleng leh a chhan hriat a ni lo.
Thil thleng hmutute sawi dan leh video darha a lan dan chuan Ningani zing hma takah khan air defence system hmangin eng nge a nih hriat chiah loh thlawkte chu kah a ni tih a lang.
A hnu lamah erawh boruak a dai zui lehnghal nia sawi a ni a, thuneitu sang pakhat chuan engkim thunun leh tawh a nih thu a sawi bawk a; mahse, eng nge thleng tih chiah a sawi lo.
Thil ring tak puak pawh a chhan hriat a ni lo va, thi leh hliam an awm em tih pawh a chiang chuang lo va. Sipai sorkar atangin engmah thuchhuah a awm rih lo.
Diori Hamani International Airport bula chengte chuan silai ri leh thil puak thawm hi Nilaini zan lai pelh hnu lawk, Ningani khaw var hma atangin an hre tan niin AFP news agency chuan a tar lang a. Darkar hnih hnu velah a reh zui tih an sawi.
Tumhmunah hian air force an inkulh a, presidential palace atanga km 10 vela hla a ni.
Mi cheng pakhat chuan silai hi tumhmun pawn lam atanga kah a ni a, thlawhna kah a tum niin BBC a hrilh.
Mi dangte chuan silai ri leh thil puak ri an hriat dan sawiin, “A mut pawh kan mu thei lo,” tiin pakhatin a sawi a. “Thil puak nghawr avang hian kan pindan leh kan inpum a nghing dur dur a ni,” a ti.
“Silai ri ka vawi hriatna a ni a, ka hlau tak zet a ni,” tiin hmeichhe pakhatin a sawi bawk.
Finfiahna awm chiah lo thu lengah chuan tute nge an nih hriat lohten tumhmun hi puak theiin an vawm a, venhim hna thawktute nen an inkap zui nia sawi a ni.
FlightRadar24 website atanga a lan dan chuan Niamey pan tur thlawhna eng emaw zat chu an kawng thlaksak an ni a. Ningani tuk khan tumhmun chhehvelah hian vengtu thahnem zawk dah an ni bawk niin AFP-in a tar lang.
Niger hi kum 2023-a sipai chakna hmanga mipui thlan president paih thlaa thuneihna chang, Abdourahamane Tiani-a’n a kaihruai mek a. An thenawma Burkina Faso leh Mali ang bawkin jihadist-te nen an inbei nasa hle.
Ningani tukah khan sipai sorkar thlawptute chuan Niamey-ah kawng an zawh.
An ram hi uranium lai chhuak tam an ni a. Sipai sorkarin an laih chhuahna hmunte an taa an neih zui mek avanga France nen intithiam lovin an thawn chhuah tur tam tak chu tumhmunah a tang mek.
“Engkim thunun a ni a, chiaina tur a awm lo,” tiin foreign ministry thuneituin a sawi tih Anadolu news agency-in a tar lang a, a sawi thui lo thung.
Silai puak awm hi uranium thawn chhuah tur tangkhang mek nen inkungkaihna a neih leh neih loh engmah a sawi duh lo bawk.
Niger khawpuiah a chhan hriat loh silai ri leh thil puak ri nasa
