Nigeria-ah biak in pahniha inkhawm lai mi 160 vel ru bo
Ralthuam nena che thin mi sual rual, bandit an tihten Nigeria-a Kaduna state-a biak in pahnih an beihnaah inkhawm lai eng emaw zat an hruai bo niin police-in an sawi a, kohhran hruaitu pakhat chuan mi 160 chuang ruk bo niin a sawi.
Kaduna state police chuan mi sualte hian Pathianni chawhma dar 11:25 khan Agogo ward-a Kurmin Wali-a ramngawa chengte lawina kohhran pahnih hi ‘ralthuam hlauhawm tak tak nen’ an luhchilh niin a sawi a. Officer-ten eng zat chiah nge an hruai bo tih hriat tumin an bei mek tih Thawhtanni khan a sawi.
Police thupuangtu chuan heng lai hmun hi a kilkhawr hle a, kawng a chhiat avangin thlen mai a harsa niin a sawi a. Thil thleng pawh a dik tak hriat a harsa tih a sawi.
An ram hma lama Christian Association of Nigeria Chairman Reverend John Hayab-a chuan inkhawm lai mi 172 hruai bo an ni tih a sawi a, a hnuah mi pakua chhuah niin mi 163 an la hreng niin Reuters a hrilh.
“Kohhran upate hnen atanga ka dawnah chuan mi 172 hruai chhuah an ni a, pakua an tlanchhuak leh a ni,” tiin Hayab-a hian a sawi.
Nigeria-ah hian miin a huhova mi an hruai bo hian a zat sawi a inang lo fo thin a. Venhim hna thawktu pawlte chuan a tlem lam hret an sawi laiin hnam leh sakhaw pawlte chuan an sawi tam thin thung a. Tun hnai lawka Kaduna state-a Catholic sikul naupang hruai bo an nih pawh khan sawi dan a inang lo.
Police chuan sipai leh venhim hna thawktu pawl dangte a hmunah awm tawhin a ru botute hnu chhuia an mi ruk bote chhanchhuah an tum mek tih an sawi.
Nigeria hmar thlangah hian tun hnaia a huhova mi hruai bo hi a tam hle a. Ram ngaw chhah tak taka tawm mi sualte hian khua, sikul leh inkhawmna inte an luhchilh thin a ni.
Nigeria-ah biak in pahniha inkhawm lai mi 160 vel ru bo
