Nigeria-ah mi sualten hmeichhe zirlai 25 ru bo
Mi sualten Nigeria hmarthlanga hmeichhe secondary school an beihnaah zirtirtu thatin hmeichhe zirlai 25 vel an ru bo niin police-in an sawi.
Gang-te hian Thawhtanni zing dar 04:00 (India-a zing dar 08:30) velah Maga, Kebbi State-a Government Girls Comprehensive Secondary School hi an bei niin an sawi.
A beitute hi ‘police nen pawh rei vak lo an inkap hmasa’ a, a hnuah sikul hungna chu hualin hostel-a awm hmeichhiate chu an hrang zui ta niin thuchhuahah police-in an tar lang.
Thawktu zinga pakhat chu zirlaite hum tuma a chetna lamah thah a ni a, a dang pakhatin silaia kah hliamna a tuar bawk a, enkawl mek a ni.
Thil thleng hmutute chuan a beitu tam tham tak, tual chhung miten bandit tia an sawi maite hian a vela mite tihchiai nan silai an hmet puak nasa hle niin an sawi.
Mi chengte chuan hmeichhe zirlaite hi an hostel atanga hruai chhuakin a bula ramhnuaiah an luhpui niin BBC an hrilh.
Police chuan ‘police tactical unit an dah belh a, sipai tirh luh belh niin tlawmngaia thawk chhuak vengtu’ an awm bawk tih an sawi.
Ruk bote zawn hna leh chhanchhuah tuma beihna hi a bul vel ngaw leh an kalna tur rinah nasa taka thawk mek zel a la ni.
Kum 10 chuang vel liam ta atang khan Nigeria hmar lama sikulte hi mi sual pawlin an bei fo thin a, zirlaite an rukte hi tlanna sum peka chhuah atan an ti thin a, a nih loh pawhin sorkar an thil phut kar nan an hmang thin a ni.
Hetianga mi ru bo thinte tihtawp nan hian Nigeria-ah hian tlanna sum inpek hi khap a ni tawh nghe nghe.
Tun hi March, 2024-a Kuduna state-a Kuriga khuaa sikul naupang 200 chuang ruk bo an nih hnua lianthama zirlai naupang ruk bo an nih leh hmasak ber a ni.
Kebbi State hi venhimna chhiatna hmun a ni a, Maga-a cheng chhungkaw tam tak pawh hi hlauhna hnuaia khawsa an ni deuh ber a, tuna ruk bote pawh hi himin hruai haw an ni leh dawn em tih a chiang lo zual hle a ni.
Nigeria-ah mi sualten hmeichhe zirlai 25 ru bo
