Night club-a luh tum pawng sutnaah mi 30 inhliam

Night club-a luh tum pawng sutnaah mi 30 inhliam
Los Angeles khawpuia night club-a luh tum intlar lai lirthei pakhatin a sut chiamnaah mi 30-in hliam an tuar.
East Hollywood-a thil thlenga hliam zinga mi pasarih chu an dinhmun a tha lo hle a, paruk chu an na hle bawk tih LA Fire Department (LAFD) chuan a sawi.
Vermont Hollywood club-a luh tum tam zawk hi hmeichhia an ni a, car-in a sut hun Inrinni zing dar 02:00 (India-a chawhnu dar 02:30) vel a ni.
Los Angeles Police Department (LAPD)-in thil thlen dan hi an chhui chiang mek a, car hian a tlan pel phawt a, kualin a sut zui tak avangin tihluih ni ngeiin an ngai niin CBS News chuan a tar lang.
LAPD chuan officer-ten a hmun an thlen chuan a bul hnaia lo awmten Nissan Versa khalhtu chu lo pawt chhuakin an lo sawisa a, pakhat phei chuan a kap niin an puang.
A khalhtu hi zai turin damdawi inah lak a nih thu LAPD chuan a sawi a, a dinhmun hriat a ni lo.
Thlalak darhah chuan car buang, a bul vela thil darh nuaih, police thahnem tak awm lai a lang.
He thil thlen lai hian nightclub-ah hian reggae/hip hop concert awm lai niin an website-ah chuan an tar lang a. Dan kengkawhtute chuan a khalhtu hi a rui hle niin an sawi tih CNN-in a tar lang.
Police chuan buaina chhuah laia silai hmet puaktu hi kein a tlanchhe zui a, Hispanic mipa a nih thu leh jersey pawl a ha a, silver rawng revolver a keng niin an sawi.
Los Angeles Mayor Karen Bass chuan thil thleng chu a lungchhiatthlak thu a sawi a. “Angeleno zawng zawngten tukina thil thleng tuartute kan tawrhpui a, thuneituten an bawhzui mek zel a ni,” a ti.
Hliam tuarte hi damdawi in emaw, trauma centre-ah emaw an zavaia hruai an ni tih LAFD Captain Adam VanGerpen chuan a hmunah hian thuthar lakhawmtute a hrilh.