Nightclub kang neitute thawn haw turin hma la
Goa nightclub kang ta neitu, Luthra unaute chu Thailand-a an tlanchhiat hnuah man an ni a, India-a hruai haw tuma hmalak mek a ni.
Saurabh leh Gaurav Luthra te hi Arpora-a Birch by Romeo Lane a kan hnu lawkah khan an tlanchhe nghal a, India ngenna angin Thai thuneituten Phuket-ah Ningani khan an man.
Luthra unau hi Bangkok-ah thlenpui niin Suan Phlu Immigration Detection Centre-ah dah an ni a. Immigration centre-ah thawn haw tura tih ngai tihfel a nih chhung an awm ang a. India atanga dan kengkawhtute pawhin an awmchilh ang.
Indian embassy chuan hruai haw an nih theih nan emergency travel certificate a tichhuak dawn a, an passport erawh la tihtawpsak reng an ni a. Tul tihfel a nih vek hnu, Thawhtanni hian hawpui hman an nih beisei a ni.
Luthra unau man leh hruai hawna turah hian Indian foreign ministry, Thailand-a Indian Embassy leh Central Bureau of Investigation (CBI) che chhuakin Royal Thai Police leh Thai sorkar nen an tangho a ni.
India-a hawpui an nih hnua Delhi-a awm restaurateur pahnih hi nightclub kang ta thubuaiah mi tihhlum leh fimkhur lo taka thil tia puhna thubuai an awrh thei a ni.
Man hmaa bail an lo dil lawkna erawh Delhi-a court-in a hnawlsak tawh bawk.
Luthra unau hi thawn an nih theih nan hian India leh Thailand an indawr reng a. Man an nih theih nan sorkarin an passport a tithi a, nightclub din turin dan an bawhchhia tiin Interpol-in blue corner notice an tichhuak bawk.
Thailand immigration thuneituten an khualbuk thlennaah manin an thlalak, an passport kenga an lak pawh an tichhuak tawh.
Inrinni zana tuipui kam state-a nightclub kangah khan mi 25 vel thiin mi parukin hliam an tuar a. Kangmei hi zanlaia chhuak niin mi 100 chuang an awm khawm lai a ni a, electric firecracker an hman atanga chhuak nia ngaih a ni.
Club chei nan thil kang duh chi hman a ni a, kangmei laka himna dan zawm a awm mang lo va, extinguisher hman tlak a awm lo bawk.
Nightclub kang neitute thawn haw turin hma la
