Zobiakvela(Masena)
Kar hmasa sunday tlai thiante nen Aizawl veng pakhata mithi râla kan lenna chu, nu ber kha kum 47 mi vel a ni a, inhre thang tih takah thil zawng zawng hi kan sawi ta thin a! “Hei, in nula thar hi khawi lam nge?” kan han ti hê-hâw a. Ani chuan, nula chu melh zauh pahin, “A lo zin ve lawk a nih hi, kan fanu a nih hi,” ti-sam êtin a kiai deuh sak a!
Nula chu in chung lamah a chho va. Kan lenna nu chuan, “Ti rû, sitting room thlanglam bathlar(varanda)-ah khuan ni lum aî ang u,” a ti a. Thingpui no leh kurtai nen kan inchawî chhuak a.
Kan hotunu-i chuan an nula chanchin chu ti hian a sawi, “Aizawl atanga 160Km vela hlâ, chumi khuaa awm chu a ni a. Nimin lawk khan Aizawl tlangval pakhat hian a rawn ru haw ve top mai a!. Kan fanu thar-i’n kan pa nena min hrilh dan chuan, ‘motor khalhin kan khuaah an lo kal a, a rawn insawi dan chuan chhungkaw khawsa thei tak, lirthei 2/3 nei, awmpuite nena zi huai huai angin leh, a room pawh zau nuam tak smart TV, refrigerator, bathroom attach thlap angin a insawi a.
Mahse, kan lo thleng thla a, an In chhung kan han lut chu ka tah a chhuak ta em em a!. A lirthei vawn lai, amá ta anga a sawi chu mi dang ta daih a lo ni a!. Chawei dawhkan takngial pawh an lo nei lo. Mutna khum pakhatah nu pakhat kum upa lam tawh; mu reng a awm a, amah leh a u (mipa tho) chu thutthlengsei-a mu ve ve thin an ni. Tun ang laî-ah chhuat phah (carpet) pawh an nei lo. An eizawnna ber chu, a û-in zu (fûnte) a zuar rú thin leh, amah chuan mi motor a khalh hawh ve zawk zawk mai hi a lo ni a, awmna chi rual a ni lo a, a tukah ka chhuahsan lehnghal a ni’,” a ti.
Chu pa, a hminga Aizawl tlangval, ‘Belvâl vala vâl’ thisen sânzia leh hmeichhe laka a lemchan dan chu kan ngaihtuah ho va!. A hmeichhia-i te-reuh pawh chu chutia nawmsakna ûm leh thlahlela mit han tih del thak mai chu(h)! Kal kawngah te chuan engnge an rawn tih thlak ang, thingtlang nula hnahkhat chuan ‘bel’ kaî tharin a thianghlimna te pawh chu engtin nge ni ta ang? Nge, zan khat a riah zan zâwk chuan? A ngaihtuahnain Tuikhur râl a kai lohna lam chu thuhran ni se la; thuthlûkna a siam ran dan êm êm chu! Hmangaihna tlachham ve tak a ni tho lo maw? ti tein zêldin thu kan bâwl ho va.
Tunlaia kan lemchanna langsar ber pakhat chu incheina (thawmhnaw) hi a ni. Hmeichhia phei chuan thil dang zawng zawng aiin an buaipui a ni ber a. Nalhpui tak tak an tam a, khawloh phah zawk mah pawh an tam.
Thawmhnaw chauh ni lo, taksa pawh kan vawng ulukin kan cheibâwl peih a, hmasâwnna chi khat chu a ni ve awm e. Nimahsela, nula tam tak, eeee…khai, nuho – fa pawm tlei chho tan tawh te hlei hlei hi an mak thin a nia!.
Nula leh Nuvalai tam tak hi chuan an hmui hmai velah hian bazar nepnawi an bel tam hlê thin mai a. |awngtai lai te hian an meng kuau emaw tih mai tur hian, an mit hmul te hi chhiar theih turin an hrual khâwm a, an khap ang fuk fuk a!. Mit hmul 8 vel lek nei te pawh hi an awm fur awm a sin! Mit hmul hraw deuh deuh neih sung mai te hi hmasawnna ni tak maw?
Hmelthat leh nalh tum hi chu a thiang a lawm. Nimahsela, thawmhnaw manto leh hnawih rimtui chi, man tam tak tak an lei a, hmai bawl hlauva zan meng rei tha ngam lo! Thau hlauh vanga puar khawp chaw ei phal lo kan kat nuk tawh!
Nilênga nalh zuar thei, Mizo hla apiang thing ti ve em em ringawt, sap tawnga biak theih si loh kan tam! Nupui pasal zawn thu-ah ngat pawh hian mi tak tak chin chuan lan dan an thlir satliah tawh lova, nihna dik tak inhmuhsak kan tum hmasa deuh zel tawh.
Tû nula mah hi a incheina man tam vang leh, thil tui leh chángkáng, a pawlh-sawp a hriat hnem vang ngawtin tûma’n mo atan an ît tawh lova. Sap hla a chham thui theih êm avang pawhin an ngaisang hek lo. An huphurh ru zâwk tawh mah a ni.
Nula thenkhat hi chu tlangval pangngai deuh chuan, “Mahni-a neih chi a ni lo,” an ti ru deuh sep sep tawh. |hian thate nena neih ho chi anni awm e! Mawi leh nalhpui emaw kan intih tam tak hi, miin min lo huphurh phahna a lo ni thei reng a!
Chutiang bawkin tlangval hautak, thawhchhuah lam aia thil changkang hre tam chi hi nula pangngaite chuan neih ngam chi-ah an ruat tawh bîk lo va. Hmân deuhva zan khat thil thua inawih lunglêna; a zán la la-a inhawn mai mai ang hun kha a liam tawh.
Nula pangngaite chuan, he mi nen hian chhungkhat kan din thei takmeuh angem? Fanau nei ila, eng angin nge kan khawsak ang? Min châwm zovin, min ti nuamsa thei dawn em? tihte hi an chhût kilhkelh tawh a, an nu leh pate thawhchhuah sa-a inchhek arbâwm te hi an hnualsuat tan hle tawh.
Thatchhe zet, sek ve tung si hian, changkang zetin nupui hnawn mai hi awl tak a ni ta!. |hiante nghenchhana nuamtâwl, thawh tur nei lo, a neihchhun ‘zing thawh’ takngial pawh peih lo te tan chuan, “Aw sual thim lungngaihthlâk tak hian chhûmpui zîng angin min tuam,” tih hla kha, faifûk hlurh hlurh chunga sak mai chi a ni ta e! Future a awm lo.
Nih lohna ang zêla lan tum hnam nih hi a zahthlak a, Politics thilah te, Kohhran leh NGO ah te pawh a ni deuh vek mai. Fianriala kan awmin leh, ka vawk lal lênna ata kan kal hranin kan nihna dik tak a lang chhuak thin.
Nula tlangval, mahni nihna bâka insawi awihawm thiam an tam mai. Social Media ah ngat phei chuan kan lang tha em em vek a, chutah chuan lainatna leh khawngaihna te hi kan nei viau hlawm a ni lo’m ni? Belhchian kan dâwl si em? Kan profile/display picture-ah reng hian a chiang. Heti mai mai hi zawng, hmasawnna lem leh mahni inmualphona mai a ni a. Nun tak leh belhchiandawl neih kan zir a hun tain a lang.
Politician zingah pawh kan inzawrh awihawm lai leh, kan thutiam te hi mipuiin an chhinchhiah mai a ni tawh lo a, a video clip nen lam engkim kan hai chhuak zung zung thei tawh si a. Lemchanna khawvel kan kalsan hunah kan ram leh a chhunga cheng mipui te hi chuan hmasawnna leh takna ram rim kan nam chho ve chauh awm a sin. Chuvangin, insawi awihawm chawpa thingtlang nula ru haw ngawt ang lo deuha, kan khawtlang nunah leh kohhranah, ram rorelnaah nun tak kan neih a ngai ta e.